Эрон ўғилларимдан бирини ўлдирмоқчи бўлди – Нетаньяху

Исроил Бош вазири Беньямин Нетаньяху Эрон унинг ўғилларидан бирига суиқасд қилишга уринганини маълум қилди. Бу ҳақда Reuters ёзди.

Бироқ гўёки режалаштирилган фитна қачон бўлгани, қайси ўғилга қаратилгани ёки унинг амалга оширилишига қанчалик оз қолгани ҳақида тафсилотлар келтирмади.

Коалицияси ижтимоий сўровномаларда ортда қолаётган Нетаньяху бу даъвони 27-октябрь куни ўтказиладиган умумхалқ сайловларига икки ой қолганда илгари сурмоқда.

"Ўғилларимга келсак... Бу ерда, назаримда, ақл бовар қилмайдиган бир гап бор. Эрон ўғилларимдан бирини нишонга олган. Эрон ўғилларимдан бирини ўлдиришга уринган," – деди Нетаньяху ҳукумат фаолиятини ижобий ёритиши билан танилган консерватив “14-канал” телеканалига.

“Эрон ўғилларимдан бирини ўлдиришга уринди, шунинг учун хавфсизлик чоралари ҳашамат эмас”, – деди у, даъво қилинган суиқасд фитнаси ёки унинг амалга оширилишига қанчалик яқин келингани ҳақида қўшимча маълумот бермаган ҳолда.

У ўғилларидан айнан қайси бирини назарда тутаётгани ҳам ноаниқ. Нетаньяҳунинг катта ўғли Яир АҚШнинг Флорида штати, Майами шаҳрида истиқомат қилади. Кичик ўғил Авнер Нетаньяху Исроилда яшайди.

Эроннинг Бирлашган Миллатлар Ташкилотидаги Нью-Йорк миссияси бу айблов юзасидан Reuters’нинг изоҳ бериш сўровига жавоб қайтармаган.