Ҳиндистонда йигит AI ёрдамида ўзини ўғирлатди

Жайпур шаҳрида яшовчи 22 ёшли муҳандис дўстларидан олган қарзини қайтариш учун оиласини алдашга уринди. У сунъий интеллект ёрдамида ўзини гаровда ва шифохонада акс эттирувчи сохта тасвирлар тайёрлаб, яқинларидан товон пули талаб қилган.

Ҳиндистоннинг Ражастан штати Жайпур шаҳрида 22 ёшли муҳандис Дипак Мали ўзининг ўғирлангани ҳақида ёлғон хабар тарқатиб, оиласидан пул ундиришга уринган. У воқеани ишонарли кўрсатиш учун сунъий интеллект (AI) ёрдамида сохта фото ва видеолар яратган.

The Times of India нашрининг полиция маълумотларига таяниб хабар беришича, йигит қариндошларига юборган тасвирларда ўзини гаровда ушлаб турилган, қийноққа солинган ва шифохонага ётқизилган ҳолатда кўрсатган. Шунингдек, у гўёки ўғирлаб кетганлар товон пули тўланмагунча уни озод қилмаслигини айтган.

Саккизта шаҳарда қидирув олиб борилган

Йигитнинг қариндошлари унинг ўғирлаб кетилгани ҳақида полицияга мурожаат қилган. Шундан сўнг Жайпур шаҳридаги Бханкрота полиция бўлими ходимлари тергов бошлаган.

Полиция маълумотларига кўра, терговчилар унинг ҳаракат йўналишини аниқлаш учун саккизта шаҳардаги видеокузатув камераларини текширган. Жайпур, Матхура, Ужайн, Деҳли, Ҳалдвани, Найнитал, Ҳаридвар ва Ришикеш шаҳарларидаги қарийб 200 та камера ёзуви ўрганилган.

Қидирув натижасида Дипак Ришикеш шаҳридаги Лакшман Жула кўприги яқинидан топилган. Полиция унинг телефони ва WhatsApp ёзишмаларини текширгач, ўғирланиш ҳақидаги воқеа тўлиқ сохталаштирилганини аниқлаган.

Қарзини қайтариш учун ёлғон режа тузган

Тергов давомида йигитнинг бу ҳаракатига сабаб бўлган молиявий муаммо ҳам аниқланган. Полиция маълумотига кўра, Дипак шахсий харажатлари ва кўнгилхушлиги учун дўстларидан қарз олган, бироқ уни қайтара олмаган.

Шундан сўнг у қарзларини ёпиш учун оиласидан пул олиш режасини тузган. Йигит сунъий интеллект ёрдамида тайёрланган сохта фото ва видеолар орқали ўзининг ўғирланганига яқинларини ишонтиришга уринган.

The Times of India нашрига Бханкрота полиция бўлими бошлиғи Дипак Тяги маълум қилишича, йигит дастлаб танасига шприц санчилаётгандек ва оғриқдан қийналаётгандек кўринадиган сохта видео яратган. Кейинчалик шу каби бошқа тасвир ва видеоларни ҳам тайёрлаб, қариндошларига юборган.

Полиция текшируви натижасида йигитнинг ўғирланиши ҳақидаги хабар ёлғон экани аниқланган.