Мирзиёев АҚШда кимлар билан учрашди?

Давлат раҳбари кимлар билан учрашди

22-сентабр куни Шавкат Мирзиёев Ню-Ёрк шаҳрида Халқаро валюта жамғармаси бошқарувчи директори Кристалина Георгиевани қабул қилди. 

Фото: Prezident.uz

Томонлар ХВЖ билан ҳамкорликни кенгайтириш, макроиқтисодий сиёсат, бюджет ва солиқ маъмуриятчилигини такомиллаштириш масалаларини муҳокама қилди.

Учрашувда мамлакат молия соҳасининг барқарорлиги, «йўл харитаси»ни амалга ошириш ҳамда ХВЖ марказларида ўзбекистонлик мутахассисларнинг малака ошириши ижобий баҳоланди.

Фото: Prezident.uz

Президент ўзига ажратилган қароргоҳда АҚШнинг Traxys компанияси директорлар кенгаши раиси Алан Доктер, Колорадо Геология мактаби витсе-президенти Жон Бредфорд, FLSmidth компанияси катта витсе-президенти Питер Фланаган, McKinsey компанияси катта ҳамкори ва Марказий Осиё бўйича офиси раҳбари Эрмолай Солженитсин, шунингдек, Go Green Partners бош директори Михаил Седой билан учрашди.

Фото: Prezident.uz

Шавкат Мирзиёев BlackRock компанияси катта бошқарувчиси Адебай Огунлеси билан ҳам учрашди.

Учрашувда энергетика, транспорт ва сув инфратузилмасини ривожлантириш бўйича стратегик ҳамкорлик масалалари муҳокама қилинди. Шунингдек, қўшма фонд ва қўшма лойиҳаларни амалга ошириш режалари қўллаб-қувватланди.

Фото: Prezident.uz

Мирзиёев Жаҳон банки гуруҳи президенти Ажай Бангани қабул қилди.

Учрашувда стратегик шерикликни кенгайтириш, барқарор иқтисодий ўсиш, камбақалиликни камайтириш ва ижтимоий-иқтисодий лойиҳаларни қўллаб-қувватлаш масалалари муҳокама қилинди.

Шунингдек, Марказий Осиё инфратузилмасини ривожлантириш ва қўшма лойиҳа портфелини кенгайтириш истиқболлари кўриб чиқилди.

Фото: Prezident.uz

Ўзбекистон раҳбари АҚШнинг йирик молиявий корпорацияси Citigroup раиси Жон Дуган билан кўришди.

Учрашувда банк ва давлат корхоналари учун облигацияларни жойлаштириш, IPO битимлари, еврооблигациялар чиқариш ҳамда молиявий ечимларни ривожлантириш масалалари муҳокама қилинди.

Шунингдек, томонлар ўзаро манфаатли ҳамкорликни кенгайтириш бўйича «йўл харитаси»ни қабул қилишга келишиб олди.

Шу билан бирга, давлат раҳбари қуйидаги шахсларни ҳам қабул қилди:

• Franklin Templeton компанияси президенти ва бош ижрочи директори Женни Жонсон;
• BNY компанияси бош тижорат директори Катинка Вальс;
• Jefferies компанияси раҳбари Брайн Фридман;
• NASDAQ фонд биржаси раиси Адена Фридман;
• Oppenheimer Holdings компанияси президенти ва бош ижрочи директори Роберт Ловентал;
• Boeing Global компанияси президенти Брендан Нелсон;
• АҚШ Президентининг Жанубий ва Марказий Осиё бўйича махсус вакили Сержио Гор;
• Air Products компанияси бош ижрочи директори Эдуардо Менезес; 
• Жаҳон савдо ташкилоти бош директори Нгози Оконжо-Ивеала.
•  

Маълумот учун, Шавкат Мирзиёев бугун, 23-сентабр куни, Ню-Ёрк вақти билан 13:00–15:00 (Тошкент вақти билан 22:00–00:00) оралиғида БМТнинг 80 йиллигига бағишланган йиғилишда нутқ сўзлайди. Бу Ўзбекистон раҳбарининг БМТ Бош Ассамблеясидаги 5-чи чиқиши бўлади.