Чорвачиликни ривожлантиришда янги қадам

Таҳлилларга кўра, кейинги 25 йилда дунё мамлакатларининг 42 фоизида қорамоллар сони 12 фоизга қисқарган. 

Бунинг асосий сабаблари қиммат озуқа, қурғоқчилик, экологик омиллар, юқори фоиз ставкалари ва даромад камайиши билан боғлиқ. 

Натижада жаҳон бозорида гўштнинг ўртача нархи рекорд даражага етган. 

Ўзбекистонда чорвачиликни ривожлантириш учун катта имконият бор. 

Мамлакатимизда 16 миллион гектар яйлов мавжуд, бироқ бу салоҳиятнинг атиги 10 фоизидан фойдаланилмоқда. 

Шу боис, Қишлоқ хўжалиги вазирлиги ҳузурида Чорвачилик ва яйлов хўжалигини ривожлантириш агентлиги ташкил этилади. 

У Ветеринария ва чорвачиликни ривожлантириш қўмитаси негизида фаолият бошлайди.

Янги агентлик олдига қуйидаги вазифалар қўйилди:

• қорамоллар сонини 16,5 миллионтага;
• қўй ва эчкилар сонини 30 миллионтага;
• паррандалар сонини 141 миллионтага етказиш.

Шунингдек, гўшт ва сутни қайта ишлаш даражасини 50 фоизга, наслдор қорамоллар улушини 90 фоизга етказиш, озуқабоп экин майдонларини эса 1,5 баробар кўпайтириш белгиланди. 

Бундан ташқари, 2029 йил 1 январдан бошлаб мева-сабзавот экспорти фақат агрологистика марказлари орқали амалга оширилади. 

Экспорт салоҳияти юқори йирик озиқ-овқат корхоналарини халқаро хатарлар таҳлили стандарти ва Алиментариус кодекси талабларига ўтказиш бўйича дастур ишлаб чиқилади. 

Ушбу кўрсаткич 2028 йилгача 20 фоизга, 2030 йилгача 60 фоизга, 2032 йилгача эса 100 фоизга етказилади.

Ўзбекистон 2030 йилга қадар озиқ-овқат маҳсулотлари экспортини 10 миллиард долларга етказиш, экспорт географиясини яна 100 та давлатга кенгайтиришни мақсад қилган.