Электрон рухсатномасиз машинани жарима майдончасидан чиқариш тақиқланади

Вазирлар Маҳкамасининг 2026 йил 22 сентябрдаги 508-сон қарори билан Тошкент шаҳрида қонунчилик ҳужжатлари бузилганлиги учун ушланган транспорт воситаларини вақтинча сақлаш жойларига олиб келиш, жойлаштириш ва сақлаб туриш тартиби тасдиқланди.

Низомга кўра, ваколатли давлат органи транспортни жарима майдончасига жойлаштириш ҳақида қарор қабул қилганда, бу ҳақда «Жарима майдончаси» модули орқали тегишли давлат органлари ва хизмат кўрсатувчи юридик шахсларга хабар юборилади.

Транспортни бошқаришдан четлаштириш назарда тутилган ҳуқуқбузарлик содир этилганда, транспорт воситаси жарима майдончасига фақат махсус техника, жумладан, эвакуатор ёки манипулятор ёрдамида олиб келиниши мумкин.

Ушланган транспорт воситасини сақлаб туришга сабаб бўлган ҳолатлар бартараф этилгандан кейин уни жарима майдончасидан чиқаришга «Жарима майдончаси» модули орқали рухсат берилади.

Рухсатнома маъмурий ишни кўриб чиқувчи органнинг мансабдор шахси томонидан айнан шу модул орқали расмийлаштирилади. Ҳужжат QR-код билан тасдиқланади.

Расмийлаштирилган электрон рухсатнома транспорт воситаси ҳайдовчиси ҳамда сақлаб туриш хизматини кўрсатувчи юридик шахсга «Жарима майдончаси» модули орқали бир иш куни ичида юборилади. Шунингдек, ҳайдовчининг телефон рақамига SMS хабар ҳам жўнатилади.

Янги тартибда электрон тизимдан ташқари расмийлаштирилган рухсатномаларга алоҳида чеклов белгиланган. Жумладан, «Жарима майдончаси» модули орқали расмийлаштирилмаган рухсатнома асосида ушланган транспорт воситасини жарима майдончасидан чиқариб юбориш тақиқланади.

Шу тариқа, транспортни сақлашга асос бўлган ҳолатлар бартараф этилганидан кейин ҳам уни чиқариш жараёни электрон тизимда расмийлаштирилган рухсатнома асосида амалга оширилиши шарт.

Низом Тошкент шаҳрида қонунчилик бузилиши сабаб ушланган транспорт воситаларини вақтинча сақлаш, уларни жойлаштириш ва чиқариш жараёнларини ягона тартиб асосида амалга оширишни белгилайди.