Энди мопед ва скутер ҳайдовчилари учун гувоҳнома олиш тартиби енгиллашади

Бу ҳақда Вазирлар Маҳкамасининг “Транспорт воситаларини бошқариш тизимини янада такомиллаштириш чора-тадбирлари тўғрисида”ги қарорида белгиланди.

Қарорга кўра, 2026 йилдан бошлаб «А1» тоифадаги гувоҳномани олиш учун талабгорлар:

• ҳайдовчиларни тайёрлаш бўйича мажбурий ўқув курсини ўтамасдан;

• тўғридан-тўғри назарий ва амалий имтиҳонларни топшириш орқали гувоҳнома олиш ҳуқуқига эга бўлади.

Шу билан бирга, номзодлар хоҳишига кўра онлайн ёки офлайн ўқув курсларида қатнашиши ёхуд мустақил тайёрланиши мумкин.

Ҳайдовчилик гувоҳномасини олиш учун ўқишни тугатганлик ҳақидаги гувоҳнома талаб этилмайди.

Шунингдек, “A”, “B”, “C”, “D” тоифали ҳайдовчилик гувоҳномасига эга шахслар автоматик равишда «А1» тоифадаги транспорт воситаларини ҳам бошқариш ҳуқуқига эга бўлади.

Имтиҳон тартиби

• Назарий имтиҳонда 20 та савол берилади;

• 16 тадан камида тўғри жавоб берган номзодлар амалий имтиҳонга қўйилади (бошқа тоифалар учун — 18 та савол талаб қилинади).

Яна бир муҳим янгиликлар:

• 2026 йил 1 февралдан “A” ва “B” тоифаси учун назарий қисмни мустақил ўзлаштириш мумкин бўлади;

• “A” ва “B” тоифали ҳайдовчиларни тайёрлаш курсларини Давлат йўл ҳаракати хавфсизлиги хизматида рўйхатдан ўтказиш тартиби бекор қилинади;

• 2026 йил 1 апрелдан автоматлаштирилган фото ва видео қайд этиш тизимлари орқали аниқланган қоидабузарликлар учун жарима баллари қўлланилади;

• жарима баллари транспорт воситасининг эгаси ёки ундан ишончнома, суғурта полиси ёки йўл варақаси асосида фойдаланувчи ҳайдовчилар ўртасида тақсимланади.

 Бу ўзгаришлар мототранспорт воситалари ҳаракатини қонунийлаштириш, хавфсизликни ошириш ва ҳайдовчиларга қулайлик яратишга қаратилган.