Иситиш мавсумида эҳтиёжманд оилаларга 1 миллион сўмдан ёрдам берилади

2026–2027 йилги иситиш мавсумида айрим эҳтиёжманд оилаларга бир марталик 1 миллион сўмдан моддий ёрдам ажратилади. Тўловлар 2026 йил 30 ноябрга қадар ижтимоий ёки банк карталарига ўтказилиши белгиланган.

Президентнинг 2026 йил 28 октабрдаги ПФ–236-сон фармонига мувофиқ, моддий ёрдам Ижтимоий реестрга киритилган оилаларга, шунингдек, “маҳалла еттилиги” хулосаси асосида реестрга киритилмаган бўлса-да, белгиланган мезонларга мос келадиган эҳтиёжманд оилаларга берилади.

Кимлар ёрдам олиши мумкин?

Ёрдам қуйидаги тоифадаги оилалар ва фуқароларга ажратилиши мумкин:

- Ижтимоий реестрга киритилган оилалар;
- реестрда бўлмаса-да, жон бошига ўртача ойлик даромади белгиланган мезондан ошмайдиган эҳтиёжманд оилалар;
- марказлаштирилган иситиш тизимига уланган кўп қаватли уйларда яшовчи, даромад мезонларига мос оилалар;
- ўзгалар парваришига муҳтож ёлғиз яшовчи кексалар ва тегишли реестрга киритилган ногиронлиги бўлган фуқаролар;
- етим ёки ота-она қарамоғидан маҳрум бўлган болалар яшайдиган оилалар.

Даромад мезони қандай?

Ижтимоий реестрга киритилмаган оилалар учун жон бошига тўғри келадиган ўртача ойлик даромад минимал истеъмол харажатларининг икки бараваридан ошмаслиги керак. Амалдаги кўрсаткич бўйича бу 1 миллион 430 минг сўмни ташкил этади.

Марказлаштирилган иситиш тизимига уланган кўп қаватли уйларда яшовчи оилалар учун Тошкент шаҳрида жон бошига даромад мезони минимал истеъмол харажатларининг уч бараваригача — 2 миллион 145 минг сўм этиб белгиланган. Қорақалпоғистон Республикаси ва вилоятларда эса икки баравар мезон қўлланади.

Айрим ҳолларда белгиланган даромад чегарасидан юқори даромадга эга оилаларга ҳам туман ёки шаҳар штабининг қарори асосида ёрдам ажратилиши мумкин.

 Ёрдам олиш учун қаерга мурожаат қилиш керак?

Ижтимоий реестрга киритилган оилалар ёрдам олувчилар тоифасига киради. Реестрга киритилмаган, аммо мезонларга мос келадиган оилалар эса яшаш жойидаги маҳаллага мурожаат қилиб, “маҳалла еттилиги” томонидан эҳтиёжмандлигини кўриб чиқишни сўраши мумкин.

Ёрдам ажратилиши оиланинг ижтимоий-иқтисодий ҳолати ва белгиланган мезонларга мувофиқлиги асосида аниқланади. Маблағлар 2026 йил 30 ноябрга қадар ижтимоий ёки банк карталарига ўтказилиши белгиланган.ки банк карталарига ўтказилиши белгиланган.