АҚШда «Green Card» лотереяси яна кечиктирилди

АҚШнинг Тўққизинчи апелляция суди 29 октябрь куни 2027 йилги Green Card лотереясини қайта очиш ҳақидаги қуйи суд қарорини вақтинча тўхтатди. Бу қарор АҚШ Давлат департаментини лотерея учун рўйхатдан ўтишни бошлашга мажбур қилувчи талаблар апелляция жараёни якунлангунига қадар бажарилмаслигини англатади.

Шу сабабли DV-2027 дастури учун рўйхатдан ўтиш санаси ҳозирча белгиланмаган. АҚШ ҳукумати лотереяни қайта очиш бўйича янги муддатни ҳам эълон қилмаган.

Суд жараёни қандай бошланган?

Аввалроқ, 14 октябрь куни Калифорния штатидаги қуйи федерал суд АҚШ Давлат департаментига 2027 йилги лотереяни қайта очиш мажбуриятини юклаган эди. Қарорга кўра, департамент 29 октябргача рўйхатдан ўтиш саналарини эълон қилиши, аризаларни қабул қилишни эса 1 ноябрдан кечиктирмай бошлаши керак эди.

Бундан ташқари, лотереяда танланган иштирокчиларга 3 декабргача виза олиш учун ариза топшириш ҳуқуқи берилгани ҳақида хабар қилиниши лозим эди.

АҚШ ҳукумати қуйи суд қарори устидан апелляция шикояти киритиб, унинг ижросини вақтинча тўхтатишни сўради. Тўққизинчи апелляция суди 29 октябрь куни ушбу талабни қаноатлантирди.

Суд қарорида ҳукуматнинг апелляцияда муваффақият қозониш эҳтимоли юқори экани қайд этилган. Бунга даъво аризаси билан чиққан Red Eagle Law юридик фирмаси лотереяни тартибга солувчи қонун ҳимоя қиладиган манфаатлар доирасига киришини етарлича асослай олмагани сабаб қилиб кўрсатилган. Шу билан бирга, апелляция суди Давлат департаментининг лотереяни ўз вақтида очмагани қонуний бўлганини тасдиқламаган.

Green Card лотереяси нима?

Diversity Visa (DV) дастури орқали АҚШ ҳар йили иммиграция даражаси нисбатан паст бўлган давлатлар фуқароларига 55 мингтагача иммиграцион виза ажратади. Дастурда қатнашиш учун ариза берганлар орасидан тасодифий танлов орқали тахминан 100 минг киши саралаб олинади. Бироқ танловда ғолиб бўлиш виза олишни кафолатламайди.

2027 молия йили учун лотерея рўйхатидан ўтиш жараёни одатдаги муддатда бошланмаган эди. АҚШ Давлат департаменти 2025 йил ноябрида ариза топшириш жараёнига ўзгартиришлар киритилаётганини билдирган, бироқ рўйхатдан ўтиш санасини эълон қилмаган.

Ҳозирча апелляция жараёни якунланиши кутилмоқда. Суднинг сўнгги қарори лотерея бутунлай бекор қилинганини англатмайди, аммо унинг қачон бошланиши масаласи яна ноаниқ бўлиб қолди.