Шаҳноза Мирзиёева Диёра Келдиёрова билан учрашди

Шаҳноза Мирзиёева қолдирган постида Диёра Келдиёровани эришган ғалабаси билан табриклаб, унга бир қанча таклифлар билан чиққанини айтиб ўтган.

“Ёзги Олимпия ўйинларидаги оламшумул ғалабаси билан Диёра Келдиёровани ўзим ва оилам номидан қутладим. Ватандошларимиз уни бежиз Тўмарисга, Ойбарчинга ўхшатишаётгани йўқ. Чунки у нафақат мамлакатимиз, балки Марказий Осиё минтақасида Олимпиада чемпиони бўлган илк дзюдочи аёл сифатида спорт тарихи саҳифаларидан жой олди”,

 дейди Мирзиёева.

Шунингдек, у Диёрага ўхшаган спортчилар келгусида жамиятдаги гендер ҳақсизликка қарши қаратилган бир қанча лойиҳаларнинг асосий юзи бўлишини айтган.

“Парижда Ўзбекистон миллий олимпия терма жамоаси аъзолари билан ҳам суҳбатлашдик, масъулиятли баҳслар олдидан уларга муваффақият тиладик. Ўзаро учрашувимиз чоғида Диёра Ижтимоий ҳимоя миллий агентлиги билан ҳамкорликда оилаларда аёлларга нисбатан учрайдиган зўравонликка, жамиятдаги гендер ҳақсизликка қарши қаратилган бир қанча лойиҳаларни биргаликда амалга ошириш, шу лойиҳаларнинг юзи ва иштирокчиси бўлиш ҳақидаги таклифимни мамнуният билан қабул қилди”, 

дейди у.

Маълумот учун, ҳозирда Диёра Келдиёрова Париж Олимпиадасида Ўзбекистон ҳисобига медаль қўшган ягона спортчи бўлиб турибди.