“Crocus City Hall” теракти: суд 15 нафар айбланувчини умрбод қамоқ жазосига ҳукм қилди

Якунда ҳарбий суд ҳужумни бевосита амалга оширган ва унга ёрдам берган жами 19 нафар шахсга турли муддатларда қамоқ жазоларини тайинлади.

Терактни амалга оширганлар

Суд қарорига кўра, терактни бевосита амалга оширган тўрт нафар шахс — Шамсиддин Фаридуни, Далержон Мирзоев, Муҳаммад Собир Файзов ва Саидакрам Ражабализода умрбод қамоқ жазосига ҳукм қилинди.

Тергав маълумотларига кўра, гуруҳнинг асосий шахси деб ҳисобланган Фаридуни жазонинг дастлабки 18 йилини қамоқхонада ўтайди. Мирзоев ва Файзов 17 йил, Ражабализода эса 16 йил қамоқхонада сақланади. Шунингдек, уларнинг ҳар бирига 990 минг рубл миқдорида жарима тайинланган.

Терактга ёрдам берган шахслар

Суд терактни тайёрлаш ва амалга оширишга ёрдам берган яна бир қатор шахсларни ҳам айбдор деб топди.

• Умеджон Солиев — умрбод қамоқ. У 12 йил қамоқхонада ўтириб, қолган муддатни махсус тартибли колонияда ўтайди. Шунингдек, унга 2,7 миллион рубл жарима тайинланган.
• Мустаким Солиев — умрбод қамоқ, 10 йил қамоқхонада ўтириб, қолган муддатни махсус колонияда ўтайди.
• Шаҳрамжон Ғадоев — умрбод қамоқ, 12 йил қамоқхонада сақланади, кейин махсус колонияда жаза ўтайди.
• Зубайдулло Исмоилов — ҳам умрбод қамоқ жазосига ҳукм қилинди.
• Ҳусайн Ҳамидов — 10 йил қамоқхонада ўтириб, кейин махсус колонияда жазо ўтайди.
• Муҳаммад Зоир Шарифзода, Ёқубжон Юсуфзода, Назримада Лутфуллаи ва Ҳусен Медов ҳам умрбод қамоқ жазосига ҳукм қилинган.

Шунингдек, айрим айбланувчиларга турли миқдордаги жарималар ҳам тайинланган.

Бошқа айбланувчиларга берилган жазолар

Айрим айбланувчиларга узоқ муддатли қамоқ жазолари берилди:

• Алишер Қосимов — 22 йил 6 ой қамоқ жазоси
• Исроил Исломов — 19 йил 11 ой қамоқ
• Диловар Исломов ва Аминжон Исломов — 19 йил 11 ойдан қамоқ жазоси

Улар жазонинг дастлабки йилларини қамоқхонада, кейин эса қатъий тартибли колонияда ўташлари белгиланган.

Суд жараёни қандай ўтди?

Суд жараёни ўтган йил август ойидан бошланиб, етти ой давом этди. Ишни 2-Ғарбий ҳарбий округ суди судьялари — Тимур Жидков, Роман Владимиров ва Алексей Пешков кўриб чиқди.

Суд мажлислари Москва шаҳар судининг катта залида ўтказилди. Бу зал тахминан 150 кишига мўлжалланган бўлиб, Европадаги энг йирик суд залларидан бири ҳисобланади.

Жараён хавфсизлик сабаблари ва иш материалларида давлат сирларига оид маълумотлар мавжудлиги туфайли ёпиқ тарзда ўтказилди.

Теракт қандай содир этилган?

Тергав маълумотларига кўра, терактни амалга оширганлардан ташқари яна 15 нафар шахс ҳужумни тайёрлаш жараёнида турли йўллар билан ёрдам берган.

Масалан, Умеджон Солиев гуруҳ фаолиятини мувофиқлаштириб турган ва ҳужумни амалга оширганларга қурол етказиб берган. Айрим айбланувчилар террористларни автомат қуроллар, ўқ-дорилар ва пул билан таъминлаган.

Шунингдек, айрим шахслар террористларга уй ижараси, транспорт ва алоқа воситалари билан ёрдам бергани аниқланган.

“Crocus” терактидан кейин нима ўзгарди?

“Crocus City Hall”даги терактдан кейин Россияда миграция сиёсатини янада кучайтириш масаласи кенг муҳокама қилинди.

Ички ишлар вазирлиги маълумотига кўра, 2024 йилда Россиядан 190 минг нафар хорижий фуқаро маъмурий тартибда чиқариб юборилган. Бу кўрсаткич аввалги йилга нисбатан сезиларли даражада кўп бўлган.

Шунингдек, Давлат Думаси ноқонуний миграцияга қарши курашни кучайтиришга қаратилган бир қатор қонун ўзгаришларини қабул қилди. Янги қонунларга кўра, ноқонуний миграцияни ташкил этиш ёки бу орқали оғир жиноятлар содир этиш 8 йилдан 15 йилгача озодликдан маҳрум қилиш билан жазоланади.