Талабалар барибир ўқиш учун Россия ҳудудига борадиган бўлди. Ижтимоий тармоқдаги миш-мишлар рад этилди

Муносабатда айтилишича, мазкур хабар ҳақиқатга тўғри келмайди.

Хабарларда тилга олинган 40 га яқин талаба Вазирлар Маҳкамасининг 2021 йилдаги 421-сонли қарорига кўра, икки давлат ҳамкорлигидаги қўшма таълим дастурига ўқишга қабул қилинган.

Таълим дастурига мувофиқ ҳар бир талаба билан шартнома тузилган, унга мувофиқ улар 4 ва 5-курсни Россиянинг Нижний Новгород шаҳрида жойлашган Приволжск тиббиёт тадқиқот университетида (ПИМУ) ўқиб тугатиш мажбуриятини олган.

Ижтимоий тармоқларда тарқалган хабарлардан сўнг, Тошкент давлат тиббиёт университети ректори Ш.Боймурадов “ПИМУ” ректори Н.Карякин билан қуйидагиларга келишилди:

• ҳамкорлик дастури бўйича ўқиётган барча Ўзбекистонлик талабалар учун алоҳида ётоқхона ажратиш;
• илгари шартнома шартларини бажармаган ва ПИМУ томонидан ўқишдан четлаштирилган талабалар учун академик йилни йўқотмасдан ўқишга қайта тикланиш имкониятини яратиш;
• ПИМУ томонидан ҳамкорлик дастури талабалари учун алоҳида деканат фаолиятини юритиш. Бунда, ушбу деканат талабаларни доимий қўллаб-қувватлаб боради, яъни аэропортдан-кутиб олиш, Россияда яшаш учун зарур барча ҳужжатларни расмийлаштиришда ёрдам беради.

Шунингдек, вазирликнинг ёзишича, Нижний Новгород шаҳри ҳақида тарқатилган “ҳарбий ҳолат эълон қилинган ҳудуд” деган маълумот ҳам асоссиз дейилмоқда.

Уларга кўра, Россия Федерациясининг мазкур ҳудудида расмий тартибда ҳарбий ҳолат эълон қилинмаган.

Аммо, Reuters ахборот агентлиги 11 августга ўтар кечаси Украинанинг Нижний Новгородга қилган дронлар орқали ҳужумидан сўнг 1 киши вафот этгани ҳамда 2 киши шифохонага ётқизилгани ҳақида ёзган. Шунингдек, Украина хавфсизлик вакили ҳужумда ҳудуддаги ракета компонентлари ишлаб чиқарувчи завод нишонга олинганини билдирган.

Маълум бўлишича ҳозирги вақтда Россиядаги мазкур университет Ўзбекистоннинг 5 та олий ўқув юрти билан 12 та ҳамкорлик қилмоқда. Қўшма дастур асосида 400 дан ортиқ ўзбекистонликлар “ПИМУ”да кундузги таълим шаклида таҳсил олмоқда.