Тошкентда икки нафар оғуфуруш қўлга тушди

Дастлабки ҳолатда Сергели туманидан ҳаракатланиб келаётган "Cobalt" русумли автомашина ҳайдовчиси қўлга олинган. У шубҳали ҳаракатлари билан туманнинг ИИБ жиноят қидирув бўлими ходимлари эътиборини тортган. 

Ходимлар мазкур шахсни текширмоқчи бўлганида фуқаро қочишга уриниб, ёнида қора "изалента"га ўралган целлофан пакетни машинадан ташлаб, қочиб кетган. 

Пакет холис одамлар томонидан ўрганилганда қора "изалента" ичидан оқ рангли полиэтилен пакетга ўралган сариқ рангли, ўткир ҳидли модда борлиги аниқланган ва ушбу пакет Сергели тумани тергов бўлимига топширилган. 

Сўнг мазкур шахс ИИБ ходимлари томонидан ушланиб, тергов қилинганда гиёҳвандлик моддасидан фуқаронинг ўзи ҳам истеъмол қилиб, савдоси билан ҳам шуғулланиб келганини айтган. 

Шу каби яна бир гиёҳвандлик моддалари билан шуғулланиб келган шахс қўлга тушган. У ижтимоий тармоқларда иш қидириб юрган вақтида гиёҳвандлик моддалари савдосига аралашиб қолганини билдирган. 

Мазкур шахс кўчада одамларга гиёҳвандлик моддаларини тарқатиш мақсадида юрганида ушланган ҳамда унинг ёнидан 38 дона полиэтилен пакетга ўралган гиёҳвандлик моддалари борлиги аниқланган. 

Юқоридаги икки нафар шахсга нисбатан Жиноят кодексининг 273-моддаси 5-қисми билан жиноят иши қўзғатилиб, қамоққа олиш борасидаги эҳтиёт чоралари қўлланган.