Toshkentda ikki nafar ogʻufurush qoʻlga tushdi

Dastlabki holatda Sergeli tumanidan harakatlanib kelayotgan "Cobalt" rusumli avtomashina haydovchisi qoʻlga olingan. U shubhali harakatlari bilan tumanning IIB jinoyat qidiruv boʻlimi xodimlari eʼtiborini tortgan. 

Xodimlar mazkur shaxsni tekshirmoqchi boʻlganida fuqaro qochishga urinib, yonida qora "izalenta"ga oʻralgan sellofan paketni mashinadan tashlab, qochib ketgan. 

Paket xolis odamlar tomonidan oʻrganilganda qora "izalenta" ichidan oq rangli polietilen paketga oʻralgan sariq rangli, oʻtkir hidli modda borligi aniqlangan va ushbu paket Sergeli tumani tergov boʻlimiga topshirilgan. 

Soʻng mazkur shaxs IIB xodimlari tomonidan ushlanib, tergov qilinganda giyohvandlik moddasidan fuqaroning oʻzi ham isteʼmol qilib, savdosi bilan ham shugʻullanib kelganini aytgan. 

Shu kabi yana bir giyohvandlik moddalari bilan shugʻullanib kelgan shaxs qoʻlga tushgan. U ijtimoiy tarmoqlarda ish qidirib yurgan vaqtida giyohvandlik moddalari savdosiga aralashib qolganini bildirgan. 

Mazkur shaxs koʻchada odamlarga giyohvandlik moddalarini tarqatish maqsadida yurganida ushlangan hamda uning yonidan 38 dona polietilen paketga oʻralgan giyohvandlik moddalari borligi aniqlangan. 

Yuqoridagi ikki nafar shaxsga nisbatan Jinoyat kodeksining 273-moddasi 5-qismi bilan jinoyat ishi qoʻzgʻatilib, qamoqqa olish borasidagi ehtiyot choralari qoʻllangan.