Трамп ФҚБнинг собиқ директорига айблов қўйилганини маълум қилди

Федерал тергов бюроси (ФҚБ)нинг собиқ директори Жеймс Комига икки жиноий модда бўйича айблов қўйилди. У 2016 йилги АҚШ президентлик сайловларига Россиянинг гўёки аралашуви ҳақидаги терговга раҳбарлик қилган эди.

Жаҳон

27.09.2025, 20:15

Lotinchada

Улашиш:

Бу ҳақда АҚШ президенти Дональд Трамп ижтимоий тармоқдаги саҳифасида маълум қилди. Оқ уй раҳбари Комини яна бир бор кескин танқид қилиб, уни «Америка тарихидаги энг ёқимсиз шахслардан бири» деб атади ҳамда «давлатга қарши жиноятлари учун жавоб бериши керак», дея таъкидлади.

«Бугун катта ҳакамлар ҳайъати унинг ноқонуний ва нотўғри ҳаракатлари учун икки оғир модда бўйича айблов эълон қилди», — деди Трамп.

АҚШ бош прокурори Пэм Бонди эса ижтимоий тармоқдаги изоҳида қонун ҳамма учун баробар эканини таъкидлаб: «Бугунги айблов Адлия вазирлигининг ўз ваколатидан суиистеъмол қилган ва халқни адаштирган шахсларни жавобгарликка тортишга қатъий интилишини кўрсатмоқда», — деди.

21 сентябр куни Трамп прокурор Бондини очиқчасига Комига чора кўришга чақирган эди. Axios нашри маълумотича, Комига Конгрессга ёлғон кўрсатма бериш ва «Россия иши» бўйича Конгресс терговига тўсқинлик қилиш айбловлари қўйилган.

«Россия изи» бўйича тергов

2017 йилда Россиянинг гўёки АҚШ сайловларига Трамп манфаати йўлида аралашгани ҳақидаги иддаолар фонида махсус прокурор сифатида Роберт Мюллер тайинланган эди. Унинг вазифаси Трампнинг сайловолди штаби фаолиятини ўрганишдан иборат бўлди. Қарийб икки ярим йиллик терговдан сўнг Трампнинг айбдорлигига доир далиллар топилмади ва иш ёпилди.

Кейинроқ АҚШ Адлия вазирлиги Жон Даремни «Россия тергови»нинг келиб чиқишини ўрганиш учун махсус прокурор этиб тайинлади. Унинг иши давомида икки киши Трампни айблаш мақсадида далиллар билан манипуляция қилганини тан олди. Шунингдек, тергов асосини ташкил этган «Стиил досьеси» демократик партия томонидан молиялаштирилгани маълум бўлди.

Жаҳон

27.09.2025, 20:15

Улашиш:

#ақш #фқб

мавзуга оид янгиликлар