Туркиядаги парламентда депутатлар муштлашди

Қайд этилишича, воқеа кеча, 16 август куни Туркия парламентида содир бўлган. Жанжал ҳукуматнинг Адолат ва тараққиёт партияси (АКП) депутати Алпай Ўзалан ҳамда Туркия Ишчилар партияси (ТИП) вакили Аҳмет Шикнинг ўртасида юзага келган. 

"Муштлашув АКП партиясининг депутати ТИП партияси депутатига бир мушт урганидан кейин бошланиб кетган",

 дейилади хабарда. 

Ижтимоий тармоқларда тарқалган видеода эса аввал Ўзаланнинг саҳна ортида турган Шикни муштлагани, шундан сўнг бошқа депутатлар бир-бирига ҳужум қила бошлаганини кўриш мумкин.

Туркия матбуотига кўра, муштлашув тахминан 20 дақиқа давом этган. Оқибатда парламент полида қон доғлари қолган. Аммо у ерда бўлганларнинг ҳеч бири тиббий ёрдамга мурожаат қилмаган. 

Маълумотларга кўра, калтакланган Аҳмет Шик ёзувчи, журналист ва Президент Эрдўғоннинг катта танқидчи сифатида оммага танилган. 2016 йилда у Туркия давлатини ҳақорат қилганликда гумонланиб, ҳибсга олинган. 2018 йилда эса “терроризмни қўллаб-қувватлаганлиги" учун 7,5 йилга қамалган, аммо суд уни озод қилган. Ўша йилнинг ўзида Шик Туркия парламентига депутат этиб сайланган.