Turkiyadagi parlamentda deputatlar mushtlashdi

Qayd etilishicha, voqea kecha, 16 avgust kuni Turkiya parlamentida sodir boʻlgan. Janjal hukumatning Adolat va taraqqiyot partiyasi (AKP) deputati Alpay Oʻzalan hamda Turkiya Ishchilar partiyasi (TIP) vakili Ahmet Shikning oʻrtasida yuzaga kelgan. 

"Mushtlashuv AKP partiyasining deputati TIP partiyasi deputatiga bir musht urganidan keyin boshlanib ketgan",

 deyiladi xabarda. 

Ijtimoiy tarmoqlarda tarqalgan videoda esa avval Oʻzalanning sahna ortida turgan Shikni mushtlagani, shundan soʻng boshqa deputatlar bir-biriga hujum qila boshlaganini koʻrish mumkin.

Turkiya matbuotiga koʻra, mushtlashuv taxminan 20 daqiqa davom etgan. Oqibatda parlament polida qon dogʻlari qolgan. Ammo u yerda boʻlganlarning hech biri tibbiy yordamga murojaat qilmagan. 

Maʼlumotlarga koʻra, kaltaklangan Ahmet Shik yozuvchi, jurnalist va Prezident Erdoʻgʻonning katta tanqidchi sifatida ommaga tanilgan. 2016 yilda u Turkiya davlatini haqorat qilganlikda gumonlanib, hibsga olingan. 2018 yilda esa “terrorizmni qoʻllab-quvvatlaganligi" uchun 7,5 yilga qamalgan, ammo sud uni ozod qilgan. Oʻsha yilning oʻzida Shik Turkiya parlamentiga deputat etib saylangan.