Тошкент аэропортида 432 миллион сўмлик 28 та ноқонуний мобил қурилма тўхтатиб қолинди

Тошкент халқаро аэропортида мобил қурилмаларни божхона назоратидан яширинча олиб ўтишга бўлган бир нечта уринишнинг олди олинди. Бу ҳақда «Тошкент-AERO» ихтисослаштирилган божхона комплекси матбуот хизмати хабар берди.

Маълум қилинишича, божхона назорати жараёнида йўловчиларнинг багажидан белгиланган тартибда декларация қилинмаган ва жисмоний шахслар учун белгиланган божсиз олиб кириш меъёридан ортиқ бўлган жами 28 та мобил қурилма аниқланган.

Улар орасида 9 та «iPhone 18 Pro Max», 5 та «iPhone 17», шунингдек, «iPhone» ва «Samsung» русумларидаги бошқа телефонлар бор.

Эътиборли жиҳати, айрим йўловчилар ўзларига тегишли бўлмаган, бошқа шахслар томонидан бериб юборилган мобил қурилмаларни ҳам олиб ўтишга уринган.

Аниқланган қурилмаларнинг дастлабки умумий қиймати 432 миллион 850 минг сўмга баҳоланган.

Ҳозирда мазкур ҳолатлар юзасидан текширув тадбирлари олиб борилмоқда.

Муаллиф: Ҳасанбой ОЧУН