Наманганда V Халқаро асал фестивали очилди

Наманган шаҳридаги “Афсоналар водийси” тематик боғида V Халқаро асал фестивалининг очилиш маросими бўлиб ўтди. Тадбирдан мақсад асаларичилик соҳасини ривожлантириш, маҳаллий маҳсулотлар салоҳиятини намойиш этиш ва халқаро ҳамкорликни кенгайтиришдир.

Очилиш маросимида иштирок этган расмийлар ва меҳмонлар асаларичилик тармоғини ривожлантириш, маҳаллий ишлаб чиқарувчиларни қўллаб-қувватлаш ҳамда асал ва асаларичилик маҳсулотлари экспортини кенгайтириш муҳимлигини таъкидлади.

Фестивалда 200 нафардан ортиқ маҳаллий ва хорижий асаларичилар, тадбиркорлар ҳамда соҳа мутахассислари қатнашмоқда. Кўргазма майдонларида жами 35 тонна асал ва асаларичилик маҳсулотлари намойиш этилмоқда. Бу иштирокчиларга маҳсулотлар билан танишиш, тажриба алмашиш ва ўзаро манфаатли ҳамкорлик алоқаларини йўлга қўйиш имконини беради.

Фестиваль дастурида шунингдек ҳунармандчилик ярмаркалари, миллий таомлар танлови, маҳаллий ширинликлар кўргазмаси ҳамда маданий-концерт дастурлари ўрин олган.