Навоий шаҳрига янги ҳоким тайинланди

Бобур Исломов Навоий шаҳри ҳокими этиб тайинланди Бу ҳақда Навоий вилояти ҳокимлиги хабар берди.

Маълум қилинишича, халқ депутатлари Навоий шаҳар Кенгашининг навбатдан ташқари сессиясида Дилмурод Эргашев шаҳар ҳокими лавозимидан озод этилган.

Навоий вилояти ҳокимининг 2026 йил 13 октябрдаги 229-5-0-Q/26-сонли қарорига мувофиқ, Бобур Исломов Навоий шаҳри ҳокими этиб тайинланган. Унинг номзоди халқ депутатлари Навоий шаҳар Кенгаши томонидан тасдиқланган.

Ушбу тайинловга қадар Бобур Исломов «Ҳудудий электр тармоқлари» АЖ бошқаруви раисининг электр тармоқларидан фойдаланиш бўйича биринчи ўринбосари лавозимида фаолият юритган.

У янги лавозимда 2023 йил 27 июлдан буён Навоий шаҳри ҳокими бўлиб ишлаб келган Дилмурод Эргашевнинг ўрнини эгаллади.

Маълумот учун: Бобур Исломов 1981 йилда Навоий вилоятининг Навбаҳор туманида туғилган. У 2003 йилда Навоий давлат кончилик институтини, 2005 йилда Бухоро озиқ-овқат ва енгил саноат технологияси институтини тамомлаган. 2012 йилда эса Олий бизнес мактабини битирган.

Муаллиф: Ҳасанбой ОЧУН