Колумбия никоҳсиз туғилишлар улуши бўйича дунёда етакчига айланди

1970 ва 2023 йиллар бўйича маълумотлар мавжуд бўлган 25 та мамлакатнинг 20 тасида 1970 йилда ҳар ўнта боладан биттасидан ҳам камроғи никоҳдан ташқари туғилган. Ўшандан буён мазкур кўрсаткич барча 25 та давлатда ошган.

Аксарият мамлакатларда расмий никоҳсиз бирга яшаётган жуфтликлар сони бўйича узоқ муддатли маълумотлар мавжуд эмас.

Шу боис ушбу кўрсаткич сўнгги ўн йилликлардаги мазкур ўзгаришларни кузатиш имконини берувчи кам сонли воситалардан бири ҳисобланади.

Колумбия илк бор мазкур маълумотлар қаторига киритилди ва барча мамлакатлар орасида энг юқори улушга эга бўлди. 2023 йилда у ерда туғилган чақалоқларнинг 87 фоизи расмий никоҳдан ўтмаган оналар ҳиссасига тўғри келган.

Марказий Осиё

Қозоғистонда 2023 йилда 347 072 нафар бола тирик туғилган. Мамлакатнинг расмий статистик маълумотларига кўра, уларнинг 89,35 фоизи расмий никоҳда бўлган оналардан дунёга келган.

Қирғизистон Миллий статистика қўмитаси 2020 йилда ҳар бешинчи чақалоқ расмий никоҳда бўлмаган онадан туғилганини қайд этган. 2016 йилда эса бу кўрсаткич ҳар тўртинчи чақалоққа тўғри келган.

Шуни унутмаслик керакки, Марказий Осиёда диний урф-одатлар асосида тузилган, бироқ давлат рўйхатидан ўтказилмаган никоҳлар ҳам тез-тез учраб туради. Шу сабабли, расмий никоҳда бўлмаган оналардан туғилган болалар улуши амалда никоҳсиз яшаётган жуфтликлар ёки отасиз тарбияланаётган болалар улушига тенг эмас.

Марказий Осиёнинг қолган давлатлари бўйича очиқ маълумотларни аниқлашнинг имкони бўлмади.