Пентагон 30 ёшдан катта ҳарбийлар учун тестостерон текширувини жорий қилди

2 сентябрь куни АҚШ Мудофаа вазирлиги (Пентагон) 30 ёш ва ундан катта бўлган ҳарбий хизматчиларда тестостерон етишмовчилигини аниқлаш бўйича янги, мажбурий кўрсатмалар эълон қилди. Бу ҳужжат Мудофаа вазири Пит Ҳегсетнинг июль ойида берган эълонининг давоми ҳисобланади.

Дарҳол кучга кирадиган ушбу кўрсатма эркаклар ва аёллар учун стандартлаштирилган текширув ва даволаш тартибларини белгилайди.

Пентагон баёнотига кўра, бу чора-тадбирлар гормонал ва энергия таъминоти билан боғлиқ муаммоларни аниқлаш ҳамда бартараф этиш орқали ҳарбий тайёргарликни оширишга қаратилган.

Тестостерон қўлланишини тарғиб қилиб келган Ҳегсет ўтган ойда янги мажбурий тартибни эълон қилди. Бу эса мутахассислар орасида бундай сиёсатнинг илмий асослари бор-йўқлиги ҳақида саволлар уйғотди.

Ушбу қўлланмага кўра, 30 ёш ва ундан катта эркаклар мажбурий тартибда тестостерон учун қон таҳлили топширади, ёшроқ эркаклар эса фақат ўз хоҳишига кўра ёки шифокорлар хавф белгиларини аниқлаган тақдирдагина текширилади.

Қўлланмада аёллар учун тестостерон миқдорини аниқлаш бўйича мунтазам қон таҳлиллари мажбурий этиб белгиланмаган. Бироқ унда гормонал мувозанат бузилиши ҳамда энергия танқислиги ва спортдаги нисбий энергия етишмовчилиги деб аталувчи ҳолатлар билан боғлиқ чарчоқ ёки ҳайз цикли бузилишларини аниқлаш учун скрининг ўтказишга чақирилади.

Шифокорлар тестостеронни оммавий текшириш кераксиз ёки потенциал зарарли даволаш усулларига олиб келишидан хавотирда. Шунингдек, ҳарбий хизматчилар орасида тестостерон миқдори пастлигини аниқлаш бўйича умумий скрининг ўтказиш АҚШнинг жанговар шайлигини оширишга оид ишончли далиллар йўқлигини таъкидлашмоқда.