Afsuski, Olimpiadani magʻlubiyat bilan boshladik

"C" guruhidan oʻrin olgan  Oʻzbekiston Olimpia terma jamoamiz oʻzining ilk oʻyinini kuchli raqib, Tokio olimpiadasi kumush medali sohibi Ispaniyaga qarshi oʻtkazdi. Oʻyindan oldingi matbuot anjumanida ikki jamoa murabbiylari ham raqibga hurmat saqlagan holda, bugungi oʻyinda hechkimga oson boʻlmasligini aytib maydonga faqat gʻalaba uchun tushishini taʼkidladi. Hamyutlarimiz oʻyinni faol boshlashiga qaramay oʻz darvozasidan birinchi toʻp olib chiqdi. Ammo birinchi taymga qoʻshib berilgan daqiqalarda raqib darvozasi tomon belgilangan penaltidan jamoamiz yetakchisi Eldor Shomurodov hisobni tenglashtirdi. Jamoalar taymni 1:1 hisobida yakunladi. Ikkinchi taymni ustunlik bilan boshlagan ispanlar oʻyinning 62-daqiqasida hisobda oldinga chiqib oldi. Gol oʻtkazib yuborgan futbolchilarimiz ustunlikni qoʻlga olib, raqib darvozasi tomon bir necha bor xavfli vaziyatlar uyushtirdi. Ammo baribir oʻyin soʻngida jismoniy tayyorgarlik oʻz soʻzini aytdi va yakunda Ispaniyaga 2:1 hisobida magʻlub boʻldik. Umid qilamizki yigitlar guruhdagi qolgan ikki oʻyinda gʻalaba qozonib, keyingi bosqich yoʻllanmasini qoʻlga kiritadi.

Maʼlumot uchun, Oʻzbekiston Olimpia terma jamoasi oʻrin olgan "C" guruhida Ispaniyadan tashqari Misr va Kongo Demokratik Respublikasi futbolchilari ham joylashgan. Olimpia terma jamoamizning keyingi oʻyini 27-iyul kuni Misr olimpiachilariga qarshi boʻlib oʻtadi.