Xitoy Tinch okeaniga ballistik raketa uchirdi

Xitoy harbiylari 6-iyul kuni sinov maqsadida atom suvosti kemasidan Tinch okeaniga raketa uchirdi, bu esa AQSH, Yaponiya, Avstraliya, Yangi Zelandiya va Tayvanning tanqidi hamda xavotirlarini kuchaytirdi.

Xalq ozodlik armiyasi harbiy-dengiz kuchlarining suvosti kemasi soat 12:01 da Tinch okeanida soxta jangovar kallakli raketani uchirdi, deya ma’lum qildi rasmiy “Sinxua” axborot agentligi ham.

“Sinxua”ning ta’riflashicha, Xitoyning yillik harbiy mashg‘ulotlari doirasidagi bu uchirishi biron-bir davlat yoki nishonga qaratilmagan “odatiy tadbir”dir.

Xitoy Tashqi ishlar vazirligi matbuot kotibi Mao Ningning so‘zlariga ko‘ra, sinov to‘liq xavfsiz, me’yorlarga muvofiq va professional tarzda amalga oshirilgan.

“Aloqador davlatlar bu masalani ortiqcha talqin qilmaydi, degan umiddamiz”, — dedi u Pekindagi brifingda.

AQSH davlat departamenti vakili Tommi Pigott o‘z bayonotida Qo‘shma Shtatlar Xitoy suvosti kemasidan uchirilib, Tinch okeanining janubiy qismiga tushgan qurolsiz qit’alararo ballistik raketasini kuzatganini aytdi.

JL-3 raketasi

“Sinxua” Xitoyning qanday turdagi raketa uchirganiga aniqlik kiritmagan.

“Global Times” nashriga ko‘ra, bu o‘tgan yili harbiy paradda namoyish etilgan Pekinning eng zamonaviy, suvosti kemasidan uchiriladigan JL-3 raketasi bo‘lishi mumkin.

Pentagon hisobotiga qaraganda, ushbu raketa Xitoy qirg‘oqlaridan turib kontinental AQSH hududiga yetib boroladi.

Tinch okeani mintaqasidagi qudratli davlatlar – Avstraliya, Yangi Zelandiya va Yaponiyaga sinov haqida qisqa muddat oldin xabar berilgan.

Tayvan munosabati

Tayvan prezidenti idorasi mazkur sinovni Xitoyning xalqaro hamjamiyatni qo‘rqitishga urinishi deb baholadi.

Xitoy o‘z hududi deb da’vo qiladigan, demokratik boshqaruvdagi ushbu orol anchadan beri Pekinning harbiy faolligi kuchayayotganidan ogohlantirib keladi.

Tayvan xavfsizlik xizmatining yuqori martabali rasmiysi 6-iyul kuni, harbiy mashg‘ulotlar avjiga chiqqan paytda, Xitoy harbiy-dengiz kuchlari harakatlarida “o‘sish tendensiyasi” kuzatilayotgani, jumladan, Rossiya bilan qo‘shma mashg‘ulotlar o‘tkazilayotganini ma’lum qildi.

Yangi Zelandiya va Yaponiya xavotirda

Yangi Zelandiya tashqi ishlar vaziri Uinston Piters sinovni nojo‘ya va tashvishli hodisa ekanligini aytdi. “Biz boshqa qo‘shnilarimiz kabi, Xitoyning Tinch okeani janubidan raketa salohiyatini sinash poligoni sifatida foydalanishidan manfaatdor emasmiz” - dedi u.

Yaponiya esa bo‘lajak raketa uchirilishi haqida xabardor etilganida Xitoy harbiylarining faollashuvidan jiddiy xavotirdaligini bildirib, Pekinni bu qarorini qayta ko‘rib chiqishga undagan.

Xitoy so‘nggi bor qit’alararo ballistik raketani 2024-yilda tajribadan o‘tkazganda, dunyo uning harbiy salohiyati yuksalib borayotganiga guvoh bo‘lgandi.