SI poygasi: Xitoyning DeepSeek kompaniyasi yangi modellarini taqdim etdi

Juma kuni Xitoy DeepSeek kompaniyasi sun’iy intellektga asoslangan mashhur chatbotining so‘nggi versiyalari -  DeepSeek-V4-Pro va DeepSeek-V4-Flash modellarining ilk sinov versiyalarini ishga tushirdi. 

Kompaniya ushbu modellar orqali OpenAI va Google kabi AQSHning texnologik gigantlari bilan tengma-teng raqobatlashishga qodir ekanini yana bir bor namoyish etmoqda.

DeepSeek'ning avvalgi chatbotlari kabi, V4-Pro va V4-Flash modellari ham ochiq manbali tizimga asoslangan. Bu esa dasturchilarga ularning kodlaridan erkin foydalanish va o‘z xohishlariga ko‘ra o‘zgartirish imkonini beradi.

DeepSeek rasmiy bayonotida ta’kidlashicha, DeepSeek-V4-Pro matematika va dasturlash yo‘nalishlarida barcha ochiq manbali modeldagi raqobatchilaridan o‘zib ketadi.

Umumiy bilimlar darajasi bo‘yicha esa u faqatgina Google'ning yopiq model hisoblangan Gemini 3.1-Pro tizimidan biroz ortda qolmoqda.

Xitoy startapining qayd etishicha, "Pro" talqinining samaradorligi OpenAI-ning GPT-5.4 va Gemini 3.1-Pro modellaridan ozgina farq qiladi. Ya’ni kompaniyaning rivojlanish sur’ati dunyoning eng ilg‘or modellaridan bor-yo‘g‘i 3-6 oy ortda qolmoqda.

Firma vakillarining so‘zlariga ko‘ra, flash modeli pro versiyasiga kabi “fikrlash” qobiliyatiga ega bo‘lib, tezroq javob qaytaradi va foydalanish uchun ancha hamyonbop narxlarni taklif qiladi.

Ushbu yangi modellar o‘tgan yilning yanvar oyida texnologiya olamini hayratda qoldirgan DeepSeek-R1 debyutidan so‘ng e’lon qilindi. O‘shanda R1 o‘zining imkoniyatlari ChatGPT va Gemini bilan deyarli bir xil darajada ekanini ko‘rsatgan edi.

Xitoyda yaratilgan DeepSeek-R1 modelning alohida e’tibor qozonishiga yana bir sabab, uni ishlab chiquvchilar so‘zlariga ko‘ra, hisoblash ishlariga 6 million dollardan kam mablag‘ sarflangan. Odatda, bunday loyihalar uchun bir necha milliard dollar ajratiladi.

Ko‘pchilik tahlilchilar bunga shubha bilan qarab, DeepSeek e’lon qilinganidan ko‘ra ko‘proq moliyaviy mablag‘ va ancha ilg‘or chiplarga ega ekanligini aytishmoqda.

DeepSeek’ning xalqaro maydonga chiqishi ma’lumotlar himoyasi va Xitoy hukumati senzurasidan xavfsirayotgan qator davlatlarning e’tirozlariga sabab bo‘ldi.

AQSHning bir nechta shtatlari, Avstraliya, Tayvan, Janubiy Koreya, Daniya va Italiya maxfiylik hamda milliy xavfsizlikka doir xavotirlarni sabab qilib, DeepSeek-R1 modeliga nisbatan cheklovlar joriy etdi.

Stanford AI Index 2026 hisobotiga ko‘ra, AQSH Kremniy vodiysida eng ilg‘or modellarni yaratish bo‘yicha hamon ustunlikni saqlab qolayotgan bo‘lsa-da, Xitoy kompaniyalari amerikalik raqobatchilari bilan sun’iy intellekt samaradorligi borasidagi tafovutni amalda “tugatdi”.

AQSh yuqori darajadagi sun’iy intellekt modellari va “kuchli ta’sirga ega patentlar”ni ko‘proq yaratmoqda, biroq Xitoy manbalar hajmi, havolalar soni, patentlar miqdori va sanoat robotlarini ishlab chiqish bo‘yicha yetakchilik qilmoqda.