Fargʻonada fuqaro suv taʼminoti nazoratchisini urib, jagʻini sindirdi

Qayd etilishicha, yuqoridagi holat joriy yilning 24 oktabr kuni Fargʻona viloyati Qoʻshtepa tumani "Sarmazor" mahallasida kuzatilgan. Ushbu mahallada yashovchi fuqaro yoniga kelgan suv taʼminoti nazoratchisi bilan janjallashishi ortidan xodimni oʻlasi qilib kaltaklagan. 

Dastlabki maʼlumotlarga koʻra, fuqaro isteʼmol suvidan 1 million 700 ming soʻm miqdorida qarzdor boʻlgan. Janjal qarzdorlik sabab yuzaga kelgan. Holat tasvirga olingan vidoda fuqaro xodimni haqoratlab, soʻng uni urib, ogʻizning pastki jagʻ qismini sindirganini koʻrish mumkin. 

"Fargʻona suv taʼminoti" AJ axborot xizmati boʻlimi tomonidan berilgan munosabatga koʻra, masʼulni kaltaklagan fuqaro avvaldan ichimlik suvidan qarzdorligi sababli ogohlantirilib kelingan. Biroq u qarzlariga vaqtida toʻlov qilmagani uchun uyiga nazoratchi yuborilgan. 

"Biz isteʼmolchini koʻp ogohlantirdik. Shunga qaramay u qarzlariga toʻlov qilmadi. Keyin biz fuqaroning xonadonini oʻrgandik. Tekshiruv davomida isteʼmolchining uyidagi suv hisoblagich noqonuniy ravishda almashtirilganini koʻrdik", deydi holatda munosabat bildirgan masʼul.

Soʻng yuqoridagi vaziyat Fargʻona viloyati Ichki ishlar boshqarmasi tomonidan oʻrganilib, xodimni kaltaklagan fuqaroga Jinoyat kodeksining 105-moddasi 2-qismi "v" bandi bilan jinoyat ishi qoʻzgʻatilgan. Hozirda unga nisbatan dastlabki tergov harakatlari olib borilmoqda. 
 

Eslatib oʻtamiz, joriy yilning 15 oktabr kuni Qashqadaryo viloyati Koson tumani "Etak" mahalla fuqarolar yigʻinida ham shunga oʻxshash holat sodir boʻlgandi. Biroq unda fuqaro viloyat gaz taʼminotining masʼul xodimi tomonidan kaltaklangan.