Oʻzbekistonda birinchi islomiy bank qachon ochiladi?

“Oʻzbekiston – 2030” strategiyasining yangilangan tahriri jamoatchilik muhokamasiga qoʻyildi. Hujjatda mamlakat moliya bozorini tubdan isloh qilishga qaratilgan muhim rejalar va aniq muddatlar belgilab berilgan.

Strategiya doirasida koʻp yillardan beri muhokama qilib kelinayotgan islomiy moliya xizmatlarini joriy etish boʻyicha aniq qadamlar eʼlon qilindi. Jumladan, 2027 yilda Oʻzbekistonda islomiy moliya xizmatlarini koʻrsatuvchi birinchi bank tashkil etilishi rejalashtirilgan.

Shuningdek, 2029–2030 yillarda yana ikkita islomiy bank faoliyati yoʻlga qoʻyilishi koʻzda tutilgan. Natijada, 2030 yilga kelib mamlakatda uchta bank islomiy moliya tamoyillari asosida ish yuritadi.

Bundan tashqari, strategiyada davlatning bank sektordagi ishtirokini qisqartirish masalasiga ham alohida eʼtibor qaratilgan. Rejaga koʻra, 2027–2030 yillar davomida har yili bittadan davlat banki xususiylashtiriladi. 2030 yilga kelib esa davlat ixtiyorida faqat toʻrtta bank qolishi kutilmoqda.

Mazkur islohotlar moliya bozorida raqobatni kuchaytirish, xususiy sektorni qoʻllab-quvvatlash va aholining islomiy moliya xizmatlariga boʻlgan talabini qondirishga xizmat qiladi.