AQShda “Anthropic” xavfli deb topildi

Bu haqda Financial Times nashri xabar berdi. Ushbu qaror Pentagon va “Anthropic” kompaniyasi oʻrtasidagi qarama-qarshilik fonida qabul qilingan.

Payshanba kuni Pentagon “Anthropic” kompaniyasini “taʼminot zanjiri uchun xavfli” deb topib, AQSh harbiylari bilan ishlaydigan hukumat pudratchilariga uning sunʼiy intellekt texnologiyalaridan foydalanishni taqiqladi.

Bu qaror kompaniya bilan bir necha oy davom etgan tortishuvlardan keyin qabul qilindi. Tortishuvga sabab — “Anthropic”ning oʻz texnologiyalariga joriy qilgan xavfsizlik cheklovlari boʻlib, Mudofaa vazirligi bu cheklovlar haddan tashqari qatʼiy ekanini bildirgan.

Qoidalar loyihasiga koʻra, hukumat bilan hamkorlik qilmoqchi boʻlgan sunʼiy intellekt kompaniyalari AQShga oʻz tizimlaridan barcha qonuniy maqsadlarda foydalanish uchun doimiy litsenziya berishi shart.

AQSh Umumiy xizmatlar boshqarmasining (GSA) mazkur koʻrsatmasi fuqarolik (harbiy boʻlmagan) shartnomalariga ham tatbiq etiladi. Gazeta xabariga koʻra, bu qaror hukumat miqyosida sunʼiy intellekt xizmatlarini xarid qilish jarayonini kuchaytirishga qaratilgan tashabbusning bir qismi hisoblanadi.

“GSAning ‘Anthropic’ bilan biznes aloqalarini saqlab qolishi Amerika xalqi oldida masʼuliyatsizlik va mamlakatimiz uchun xavfli boʻlar edi”, — deya Reuters agentligiga elektron pochta orqali maʼlum qilgan Federal xaridlar xizmati komissari Josh Gruenbaum. Federal xaridlar xizmati GSAning hukumat uchun dasturiy taʼminot xarid qilishga yordam beruvchi boʻlinmasi hisoblanadi.

Gruenbaumning aytishicha, prezident koʻrsatmasiga binoan Umumiy xizmatlar boshqarmasi “Anthropic” kompaniyasining OneGov kelishuvini bekor qilgan. Natijada kompaniya xizmatlari avvaldan kelishilgan shartnomalar orqali ijroiya, qonun chiqaruvchi va sud hokimiyati tarmoqlariga taqdim etilishi toʻxtatilgan.

Yangi loyihaga koʻra, pudratchilar sunʼiy intellekt tizimlari ishlab chiqaradigan maʼlumot yoki javoblarga qasddan partiyaviy yoki mafkuraviy qarashlarni kiritmasligi shart.

Hujjat, shuningdek, kompaniyalardan ularning sunʼiy intellekt modellari AQSh federal hukumatidan tashqari boshqa davlat hukumatlari yoki tijoriy tartib-qoidalariga moslashtirilgan yoki sozlangan-sozlanmaganini oshkor qilishni talab qiladi.

“Anthropic” norozi

Ommaviy kuzatuv va avtonom qurollar yuzasidan xavotirlari tufayli mudofaa idoralariga oʻzining sunʼiy intellekt vositalaridan cheklanmagan tarzda foydalanishga ruxsat berishdan bosh tortgan “Anthropic” kompaniyasi yangi qoidalar ustidan sudga murojaat qilishini maʼlum qildi.

“Biz bu harakatni qonuniy asosga ega deb hisoblamaymiz va sud orqali eʼtiroz bildirishdan boshqa ilojimiz yoʻq”, — deb yozdi payshanba kuni kechqurun kompaniya bosh direktori Dario Amodey.

Senator Kirsten Gillibrand esa “Anthropic”ni taʼminot zanjiri uchun xavfli deb belgilash qarorini “kaltafahmlik, oʻz-oʻzini yoʻq qilish va dushmanlarimizga sovgʻa” deb baholadi.

“Hukumat Amerika kompaniyasiga oʻz xavfsizlik choralarini buzishdan bosh tortgani uchun ochiq hujum qilmoqda. Buni Xitoydan kutish mumkin edi, Qoʻshma Shtatlardan emas”, — deya qoʻshimcha qildi senator.

Shunga qaramay, kompaniyaga tegishli Claude sunʼiy intellekt modeli ommalashuvda davom etmoqda. “Anthropic” maʼlumotiga koʻra, har kuni bir milliondan ortiq odam Claude dasturida roʻyxatdan oʻtmoqda.

I.JUMANAZAROV