АҚШда “Anthropic” хавфли деб топилди

Бу ҳақда Financial Times нашри хабар берди. Ушбу қарор Пентагон ва “Anthropic” компанияси ўртасидаги қарама-қаршилик фонида қабул қилинган.

Пентагон “Anthropic” компаниясини “таъминот занжири учун хавфли” деб топиб, АҚШ ҳарбийлари билан ишлайдиган ҳукумат пудратчиларига унинг сунъий интеллект технологияларидан фойдаланишни тақиқлади.

Бу қарор компания билан бир неча ой давом этган тортишувлардан кейин қабул қилинди. Тортишувга сабаб — “Anthropic”нинг ўз технологияларига жорий қилган хавфсизлик чекловлари бўлиб, Мудофаа вазирлиги бу чекловлар ҳаддан ташқари қатъий эканини билдирган.

Қоидалар лойиҳасига кўра, ҳукумат билан ҳамкорлик қилмоқчи бўлган сунъий интеллект компаниялари АҚШга ўз тизимларидан барча қонуний мақсадларда фойдаланиш учун доимий лицензия бериши шарт.

АҚШ Умумий хизматлар бошқармасининг (GSA) мазкур кўрсатмаси фуқаролик (ҳарбий бўлмаган) шартномаларига ҳам татбиқ этилади. Газета хабарига кўра, бу қарор ҳукумат миқёсида сунъий интеллект хизматларини харид қилиш жараёнини кучайтиришга қаратилган ташаббуснинг бир қисми ҳисобланади.

“GSAнинг ‘Anthropic’ билан бизнес алоқаларини сақлаб қолиши Америка халқи олдида масъулиятсизлик ва мамлакатимиз учун хавфли бўлар эди”, — дея Reuters агентлигига электрон почта орқали маълум қилган Федерал харидлар хизмати комиссари Жош Груэнбаум. Федерал харидлар хизмати GSAнинг ҳукумат учун дастурий таъминот харид қилишга ёрдам берувчи бўлинмаси ҳисобланади.

Груэнбаумнинг айтишича, президент кўрсатмасига биноан Умумий хизматлар бошқармаси “Anthropic” компаниясининг OneGov келишувини бекор қилган. Натижада компания хизматлари аввалдан келишилган шартномалар орқали ижроия, қонун чиқарувчи ва суд ҳокимияти тармоқларига тақдим этилиши тўхтатилган.

Янги лойиҳага кўра, пудратчилар сунъий интеллект тизимлари ишлаб чиқарадиган маълумот ёки жавобларга қасддан партиявий ёки мафкуравий қарашларни киритмаслиги шарт.

Ҳужжат, шунингдек, компаниялардан уларнинг сунъий интеллект моделлари АҚШ федерал ҳукуматидан ташқари бошқа давлат ҳукуматлари ёки тижорий тартиб-қоидаларига мослаштирилган ёки созланган-созланмаганини ошкор қилишни талаб қилади.

“Anthropic” норози

Оммавий кузатув ва автоном қуроллар юзасидан хавотирлари туфайли мудофаа идораларига ўзининг сунъий интеллект воситаларидан чекланмаган тарзда фойдаланишга рухсат беришдан бош тортган “Anthropic” компанияси янги қоидалар устидан судга мурожаат қилишини маълум қилди.

“Биз бу ҳаракатни қонуний асосга эга деб ҳисобламаймиз ва суд орқали эътироз билдиришдан бошқа иложимиз йўқ”, — деб ёзди пайшанба куни кечқурун компания бош директори Дарио Амодей.

Сенатор Кирстен Гиллибранд эса “Anthropic”ни таъминот занжири учун хавфли деб белгилаш қарорини “калтафаҳмлик, ўз-ўзини йўқ қилиш ва душманларимизга совға” деб баҳолади.

“Ҳукумат Америка компаниясига ўз хавфсизлик чораларини бузишдан бош тортгани учун очиқ ҳужум қилмоқда. Буни Хитойдан кутиш мумкин эди, Қўшма Штатлардан эмас”, — дея қўшимча қилди сенатор.

Шунга қарамай, компанияга тегишли Claude сунъий интеллект модели оммалашувда давом этмоқда. “Anthropic” маълумотига кўра, ҳар куни бир миллиондан ортиқ одам Claude дастурида рўйхатдан ўтмоқда.

И.ЖУМАНАЗАРОВ