Kolumbiya nikohsiz tug‘ilishlar ulushi bo‘yicha dunyoda yetakchiga aylandi

1970-yil hamda 2023-yil bo‘yicha ma’lumotlarga ega 25 ta mamlakatning 20 tasida 1970-yilda har o‘nta boladan bittasidan kamrog‘i nikohsiz tug‘ilgan. O‘shandan buyon mazkur ko‘rsatkich barcha 25 ta davlatda oshdi.

Aksariyat mamlakatlarda rasmiy nikohsiz birga yashayotgan juftliklar soni bo‘yicha uzoq muddatli ma’lumotlar mavjud emas. 

Shu bois ushbu ko‘rsatkich so‘nggi o‘n yilliklardagi mazkur o‘zgarishlarni kuzatish imkonini beruvchi kam sonli vositalardan biri hisoblanadi.

Kolumbiya ilk bor mazkur ma’lumotlar qatoriga kiritildi va barcha mamlakatlar orasida eng yuqori ulushga ega. 2023-yilda u yerda tug‘ilgan chaqaloqlarning 87 foizi rasmiy nikohdan o‘tmagan onalar hissasiga to‘g‘ri kelgan.

Markaziy Osiyo

Qozog‘istonda 2023-yilda 347 072 nafar bola tirik tug‘ilgan. Mamlakatning rasmiy statistik ma’lumotlariga ko‘ra, ularning 89,35 foizi rasmiy nikohda bo‘lgan onalardan dunyoga kelgan. 

Qirg‘iziston Milliy statistika qo‘mitasi 2020-yilda har beshinchi chaqaloq rasmiy nikohda bo‘lmagan onadan tug‘ilganini qayd etgan. 2016-yilda esa bu ko‘rsatkich har to‘rtinchi chaqaloqqa to‘g‘ri kelgan.

Shuni unutmaslik kerakki, Markaziy Osiyoda diniy urf-odatlar asosida tuzilgan, biroq davlat ro‘yxatidan o‘tkazilmagan nikohlar ham tez-tez uchrab turadi. Shu sababli, rasmiy nikohda bo‘lmagan onalardan tug‘ilgan bolalar ulushi amalda nikohsiz yashayotgan juftliklar yoki otasiz tarbiyalanayotgan bolalar ulushiga teng emas.

Markaziy Osiyoning qolgan davlatlari bo‘yicha ochiq ma’lumotlarini aniqlashning imkoni bo‘lmadi.