BMT Tolibonni ayollarga nisbatan tazyiqlarni bekor qilishga chaqirdi

BMT Xavfsizlik Kengashi 15-iyun kuni bir ovozdan rezolyutsiya qabul qildi. Unda Tolibon ayollarga nisbatan repressiyalarni zudlik bilan bekor qilishga hamda Pokiston transchegaraviy hujumlar uyushtirishda ayblayotgan Afg‘onistondagi jangari guruhlarga qarshi kurashishga chaqirilgan.

Rezolyutsiya BMTning Afg‘onistondagi siyosiy missiyasi muddatini 2027-yil 17-iyungacha uzaytirib, unga gumanitar yordam yetkazilishini qo‘llab-quvvatlaydi. Shuningdek, jinsi, dini yoki etnik kelib chiqishidan qat’i nazar, ayollar, etnik ozchiliklar, yoshlar va nogironligi bo‘lgan shaxslarning hech qanday kamsitishlarsiz to‘liq ishtirokidagi boshqaruvni ilgari surish vakolatini beradi.

Mazkur rezolyutsiya shu oy Hirot shahrida 30 nafar ayolning qat’iy kiyinish qoidalarini buzganlikda ayblanib hibsga olinishi ortidan qabul qilindi.

BMTning Afg‘onistondagi yordam missiyasi (UNAMA) ma’lumotlariga ko‘ra, hibsga olishlar sababli kelib chiqqan norozilik namoyishini Tolibon politsiyasi kuch bilan tarqatib yuborgan, natijada bir kishi otib o‘ldirilgan, bir necha kishi jarohatlangan.

Tolibon harakati 2021-yilda Afg‘oniston boshqaruvini qo‘lga olgandan so‘ng ayollar va qizlarga nisbatan boshlang‘ich maktabdan keyingi ta’limni hamda ko‘plab kasblarni taqiqlash kabi keskin cheklovlar joriy etdi.

Pokiston Afg‘onistonni qonli hujumlar uyushtiruvchi jangarilarga boshpana berganlikda ayblaydi, ammo buni inkor etib keladi Tolibon.

Fevral oyida Afg‘oniston Pokistonning havo zarbalariga javoban hujum qilganidan buyon ikki mamlakat o‘rtasidagi to‘qnashuvlarda yuzlab odamlar halok bo‘ldi.

Pokistonning BMTdagi elchisi Osim Ahmadning so‘zlariga ko‘ra, rezolyutsiyada Afg‘onistonda xalqaro tinchlik va xavfsizlikka tahdid solishda davom etayotgan terrorchi guruhlar mavjudligidan Kengashning jiddiy xavotiri aks etgan.

Shuningdek, yangi rezolyutsiya UNAMAga Afg‘onistonning iqtisodiy rivojlanishiga ko‘maklashish, tijoriy va moliyaviy faoliyatni osonlashtirish hamda afg‘on xalqi manfaatlari yo‘lida Markaziy bankka tegishli aktivlarni qaytarish sa’y-harakatlarini olib borishga vakolat beradi.