Navoiyda tabiatga 6 mlrd soʻmdan ziyod zarar yetkazildi

Bayon qilinishicha, Navoiy viloyati Ekologiya, atrof-muhitni muhofaza qilish va iqlim oʻzgarishi boshqarmasi davlat inspektorlari tomonidan viloyat IIB bilan hamkorlikda nazorat reyd tadbiri oʻtkazilgan. 

Unda Navbahor tumani "Qorovultepa" MFY hududidan oqib oʻtuvchi Zarafshon daryosida soat tonggi 04:30 da oʻtkazilgan reyd davomida Qiziltepa tumani Toshrabot qishlogʻida yashovchi fuqarolar Gʻ.Sh., O.M. va A.Z. Zarafshon daryosidan elektr qarmoq yordamida baliq ovlashgani aniqlangan.

"Huquqbuzarlar jami 26 ta tovon, 8 ta oq amur, 6 ta doʻngpeshona, 32 ta zogʻora, 32 ta laqqa, 249 ta Samarqand loyxoʻragi hamda 46 ta Oʻzbekiston Qizil kitobiga kiritilgan Turkiston moʻylovdori baliqlarini ovlashgan. Oqibatda tabiatga 6 milliard 324 mln soʻm zarar yetkazilgan", deyiladi xabarda.

Holat yuzasidan huquqbuzarlarga nisbatan Oʻzbekiston Respublikasi Maʼmuriy javobgarlik toʻgʻrisidagi kodeksning 90-moddasi 4-qismi bilan maʼmuriy bayonnoma rasmiylashtirilgan. Hujjatlar holatga huquqiy baho berish va chora koʻrish uchun viloyat prokuraturasiga yuborilgan.