Qirgʻizistonda guruch atrofida bahs: kontrabandami yoki eksport soʻrovi?

Qirgʻiziston parlamenti yigʻilishida deputat Burul Amanova Oʻzbekistondan noqonuniy yoʻl bilan olib kirilgan arzon guruch sababli Batken viloyatidagi dehqonlar oʻz mahsulotini sota olmayotganini bildirdi.

Uning soʻzlariga koʻra, Oʻzbekistondan kontrabanda orqali kirgan guruch ichki bozorda narxlarni tushirib yuborgan va mahalliy dehqonlarni qiyin ahvolga solgan.

Qirgʻiziston qishloq xoʻjaligi vaziri Bakit Torobayev esa bu daʼvoni inkor qildi. Uning taʼkidlashicha, vaziyat aksincha: Oʻzbekiston tomoni Qirgʻizistondan guruch soʻragan.

“Oʻzbekiston vaziri bizda guruch kam, deb mendan guruch soʻraydi. "Bizga guruch yetkazib beringlar", deb 32 ming tonna guruch soʻradi. Men esa rad javobini berdim. Yana chegarachilarga aytaman, vaziyatni oʻrganishsin,” — dedi Qirgʻiz vaziri.