Parij-2024: Oʻzbekiston delegatsiyasi hisobiga kumush medal qoʻshildi

Dastlab para velosport boʻyicha erkaklar oʻrtasida C2 klassida shosse yoʻnalishida vaqt poygasi dasturida ishtirok etgan Oʻzbekiston delegatsiyasi aʼzosi Gʻolibbek Mirzayorov 2 daqiqa 21.66 soniya natija koʻrsatib, 7-oʻrinni band etdi. Ammo para sportchi qayd yetgan ushbu natija saralashdan oʻtish uchun yetarli boʻlmadi.

Para sportchi Dmitriy Xorlin erkaklar oʻrtasida S13 klassida 100 metrga erkin usulda suzish boʻyicha oʻtkazilgan saralash bahslarida ishtirok etdi. Dmitriy Xorlin bu bosqichda 56.80 soniya natija qayd etdi va oʻz guruhida 5-oʻrinni egalladi. Para suzuvchi uchun bu natija keyingi bosqich yoʻllanmasini qoʻlga kiritish uchun yetarli boʻlmadi.

Ayollar oʻrtasida F41 klassida disk uloqtirish boʻyicha final bahslari yakuniga yetdi. Ushbu dasturda qatnashgan ikki nafar oʻzbekistonlik sportchi Kubaro Hakimova hamda Madina Muxtorova 9 va 11 oʻrinni egalladi.

Oʻzbekiston terma jamoasining mahoratli para oʻq otuvchisi Server Ibragimov kumush medalni qoʻlga kiritdi. Para sportchi P4 klassida 50 metrdan toʻpponchadan oʻq otish dasturida 215.3 ball jamgʻarib, shohsupaning ikkinchi pogʻonasidan joy oldi. Bu uning faoliyatida Paralimpiya oʻyinlaridagi ikkinchi medal boʻldi.Ushbu dasturda ishtirok etgan Oʻzbekiston terma jamoasining boshqa bir aʼzosi Shahnoza Mamajonova 517 ochko bilan 21-oʻrinni egalladi va saralashdan oʻta olmadi.

Para yengil atletika boʻyicha ayollar oʻrtasida F46 klassida yadro uloqtirish dasturida final bellashuvlari yakunlandi. Unda ishtirok etgan ikki nafar sportchi  Roziya Ergasheva hamda Shaxina Yigitaliyeva finalda 9 va 12 oʻrinlarni egallashdi.

Para velosport boʻyicha erkaklar oʻrtasida C5 klassida shosse yoʻnalishida vaqt poygasi dasturida ishtirok etgan delegatsiyaning navbatdagi vakili Azimbek Abdullayev 41 daqiqa 23.64 soniya natija koʻrsatib, 10-oʻrinni band etdi. Afsuski, sportchi ushbu natijasi orqali saralashdan oʻta olmadi.

Para yengil atletika boʻyicha erkaklar oʻrtasida T11 klassida 100 metrga yugurish bahslarida qatnashgan Urganch Egamnazarov 11.68 soniya natija bilan oʻz guruhida 2-oʻrinni egalladi va yarim final bosqichiga yoʻllanma oldi.

Shu tariqa Paralimpiya oʻyinlarida oʻzbekistonlik sportchilarning 4 sentabr kunidagi chiqishlari oʻz yakuniga yetdi. Kun bellashuvlarida ishtirok etgan 10 nafar para sportchining faqat bittasi medal bilan kifoyalandi. Server Ibragimovning kumush medali Oʻzbekiston terma jamoasining medallar sonini bittaga koʻpaytirdi xolos. Kecha medallar reytingida terma jamoa 10 oʻrinda turgan boʻlsa, yakunlangan bellashuvlardan soʻng ikki pogʻona pastlab, hozirda 12 oʻrinni egallab turibdi.