Shimoliy Koreya AQSh bilan yarashishi mumkin, ammo Janubiy Koreyani “yoʻq qilish”ga tayyor

Shu bilan birga, u Seul bilan munosabatlardagi diplomatik kelishuvga boʻlgan umidlarni puchga chiqardi.

Shimoliy Koreya yetakchisi Kim Chen In agar Pxenyan xavfsizligi xavf ostida qolsa, uning mamlakati Janubiy Koreyani “butunlay yoʻq qilishi” mumkinligini aytdi. U Ishchilar partiyasining qurultoyida Seul bilan muloqot qilishdan voz kechganini takrorladi.

“Shimoliy Koreya oʻzining eng ashaddiy dushmani boʻlgan Janubiy Koreyaga mutlaqo aloqasi yoʻq va Janubiy Koreyani hech qachon oʻz vatandoshi sifatida tan olmaydi, — deb bayonot berdi Kim. — Toki Janubiy Koreya biz bilan chegaradosh boʻlishdek geosiyosiy sharoitdan qutula olmas ekan, xavfsiz yashashning yagona yoʻli — biz bilan bogʻliq narsalardan voz kechib, Shimoliy Koreyani oʻz holiga qoʻyishdir”.

Soʻnggi yillarda Kim Seulga qarshi keskin bayonotlar berib, koreyalararo diplomatiyani rad etishini taʼkidlab kelmoqda. Ekspertlarning fikricha, bu harbiy toʻqnashuvlardan darak bermaydi, aksincha, Pxenyan yadroviy arsenali hamda Moskva va Pekin bilan aloqalariga tayanib, mintaqadagi oʻrnini mustahkamlashga qaratilgan keng koʻlamli saʼy-harakatlarga intilmoqda.

Shuningdek, agar Vashington uni yadroviy davlat sifatida tan olsa, Kim muloqot uchun eshik ochiqligini bildirdi.

Taxminlarga qaraganda, Donald Tramp joriy yil oxiridagi Xitoyga tashrifi chogʻida Kim Chen In bilan uchrashishi mumkin.

Shimoliy Koreya markaziy axborot agentligi xabariga koʻra, Kim yadroga ega qurolli kuchlarni mustahkamlash uchun yangi tizimlarini ishlab chiqishga chaqirgan.

Bularga suv ostidan uchirilishi mumkin boʻlgan qitʼalararo ballistik raketalar, Janubiy Koreyaga qaratilgan artilleriya snaryadlari kabi taktik yadroviy qurollarning kengaytirilgan arsenali kiradi.

Muallif: Isomiddin Jumanazarov