Shavkat Mirziyoyev ITB bilan yangi Strategik sheriklik dasturini qabul qilish tashabbusini ilgari surdi

Uchrashuv avvalida ushbu nufuzli xalqaro moliyaviy tashkilot rahbari forum muvaffaqiyatli oʻtkazilgani bilan samimiy tabriklab, ITB Oʻzbekistonda kambagʻallikni yanada qisqartirish borasidagi vazifalarni har tomonlama qoʻllab-quvvatlashga tayyor ekanini taʼkidladi.

Oʻzbekistonda ortga qaytmas tus olgan islohotlar strategiyasini amalga oshirishga koʻmaklashish maqsadida Bank guruhi bilan keng koʻlamli hamkorlikni yanada kengaytirish masalalari muhokama qilindi.

Keyingi yillarda ITB bilan sheriklik jadal rivojlanib borayotgani alohida mamnuniyat bilan qayd etildi. Qoʻshma loyihalar portfeli 5 milliard dollardan oshib, bugungi kunda transport, infratuzilma, uy-joy qurilishi, energetika, sogʻliqni saqlash, taʼlim kabi ustuvor sohalarni qamrab olgan. Shu bilan birga, investitsiyalarning 40 foizdan ortigʻi xususiy sektorga toʻgʻri keladi.

Davlat rahbari ITB bilan loyihalar portfelini ikki barobar koʻpaytirish, infratuzilma, ijtimoiy soha va xususiy sektor loyihalarini moliyalashtirish hajmini oshirishni nazarda tutadigan uzoq muddatli Strategik sheriklik dasturini qabul qilish tashabbusini ilgari surdi.

Xususiy biznes salohiyatini roʻyobga chiqarish, mamlakatimiz hududlarida zamonaviy tibbiyot markazlarini barpo etish, avtomobil yoʻllarini modernizatsiya qilish, irrigatsiya kanallarini tiklash va betonlash hamda boshqa yoʻnalishlarda aniq loyihalarni ilgari surishga alohida eʼtibor qaratildi.