IIV rahbariyati ilk bor Furqatdagi holat boʻyicha munosabat bildirdi

Ichki ishlar vaziri maslahatchisi Zokirjon Almatov Fargʻona viloyati Furqat tumani IIB xodimlari tomonidan maktab direktorining tahqirlanishiga munosabat bildirdi. Bu haqda u IIV huzuridagi Jamoatchilik kengashi aʼzolari va OAV vakillari ishtirokida oʻtkazilgan matbuot anjumanida toʻxtalib oʻtdi.

Almatovning taʼkidlashicha, ichki ishlar idoralarida ishlaydigan har bir xodim oʻzini psixologik jihatdan tayyorlashi, jahlini jilovlay olishi kerak. 

“Bu — oʻtaketgan vahshiylik. U rahbar [tuman IIB boshligʻi — tahr.] qaysidir yoʻllar bilan amalga oʻtirib qolgan, deb oʻylayman. Qanday sharoitda boʻlsa ham, ichki ishlar idorasi xodimi oʻzini ushlashni bilishi kerak. Biz oʻzidan ketib qolgan bunday rahbarlarni aslo kechirmaymiz”, — dedi u.

«Har bir yigʻilishda vazir, vazirlik rahbariyati, viloyat ichki ishlar boshqarmasi boshliqlari xodimlardan shu narsani talab qiladi: jahlingga erk berma, jahlingni jilovla, odamlarni avval yaxshilab eshit, deymiz. Hatto bizga jahl qilib, oʻzini osib qoʻyganlar ham boʻlgan. Shuning uchun yigitlar, qizlarimiz, eshitinglar. Insonlarga nisbatan mehr-muhabbat degan tuygʻularning hammasi bizda boʻlish shart. Siz bilan biz faqat qamash uchun yaratilmaganmiz. Tarbiyalash, insonlarga gʻamxoʻrlik qilish, ularga yordam berish uchun ichki ishlar xodimlari bor. Shu narsa hech qachon esimizdan chiqmasin. Lekin odam boʻlmaydiganlarning qonun boʻyicha jazosini berishimiz shart. Shu bois bizning faoliyatimizda har xil odamlar uchrab turadi», — deydi IIV maslahatchisi.

Zokirjon Almatovning qoʻshimcha qilishicha, mazkur holat boʻyicha maxsus tekshiruv olib borilmoqda.

Eslatib oʻtamiz, avvalroq Furqat tumanida IIB xodimlari maktab direktori boʻlib ishlaydigan 34 yoshli ayolni tuman soliq inspeksiyasi boshligʻi bilan birga yechintirib, kaltaklagani maʼlum boʻlgan edi. Ular ayolni soliq inspeksiyasi boshligʻi ustidan yolgʻon ariza berishga majburlab, kaltaklagan. Garchi IIB rahbari va oʻrinbosariga jinoyat ishi ochilgan boʻlsa-da, bu ishni sodir etgan IIB xodimlari hamon ozodlikda.
Senat mazkur ish nazoratga olinganini bildirdi. Oliy sudga koʻra, Furqat tumani IIB boshligʻi va oʻrinbosari 6 ta modda boʻyicha ayblanmoqda.