Eron va Ummon Hormuz bo‘g‘ozida vaqtinchalik koridor ochishni muhokama qilmoqda

25-avgust kuni Eron va Ummon tashqi ishlar vazirlari Tehronda uchrashdi. Uchrashuvda Hormuz bo‘g‘ozi orqali kemalar harakatini bosqichma-bosqich tartibga solish masalasi muhokama qilindi.

Ummon tashqi ishlar vaziri Badr al-Busaydiy va uning eronlik hamkasbi Abbos Aroqchi “keyingi qadamlar uchun asos yaratuvchi bosqichma-bosqich yondashuvni muhokama qildilar”, deyiladi qo‘shma bayonotda.

Taklif etilayotgan yondashuv bo‘g‘oz orqali “vaqtinchalik qo‘shma navigatsiya yo‘lagi” ochishni va suv yo‘lini minalardan tozalash loyihasini o‘z ichiga oladi.

Keyingi muzokaralarda doimiy navigatsiya yo‘lagi, bo‘g‘ozning kelajakdagi boshqaruvi, axborot almashish, harakatni tartibga solish hamda tegishli navigatsiya va xavfsizlik mexanizmi yo‘lga qo‘yilishi rejalashtirilgan.

“Tez orada Hormuz bo‘g‘ozi uchun vaqtinchalik yo‘lak ochilishini e’lon qilishimizga umidvorman,” — deb yozdi Albusaidiy X ijtimoiy tarmog‘ida. 

U ikki davlat doimiy yechim topish, shuningdek, bo‘g‘ozni kim boshqarishi bo‘yicha kelishuvga erishish ustida ishlashini qo‘shimcha qildi.

Eron tashqi ishlar vaziri o‘rinbosari Kozim G‘aribobodiyning davlat televideniyesiga ma’lum qilishicha, Ummon ko‘rfazidan Fors ko‘rfaziga kiruvchi dengiz transporti uchun vaqtinchalik yo‘lak to‘liq Eron suvlari orqali, chiqish yo‘lagi esa Eron va Ummon suvlari orqali o‘tadi.

G‘aribobodiyning qo‘shimcha qilishicha, Eron va Ummon 30 kundan 60 kungacha davom etadigan keyingi muzokaralarni o‘tkazadi.

“Ummonni bombalaymiz”

Uchrashuv AQSH prezidenti Donald Tramp Vashington va Tehron o‘rtasidagi Hormuz bo‘g‘ozi yuzasidan muzokaralarga Ummon to‘sqinlik qilgudek bo‘lsa, unga zarba berish bilan tahdid qilganidan bir hafta o‘tib o‘tkazildi.

“Agar Ummon yo‘limizga to‘g‘onoq bo‘lsa, biz ularni bombardimon qilamiz”, – dedi Tramp AQSh va Eron o‘rtasidagi iyun oyi anglashuv memorandumining muddati tugashi bilan.

Shunday qilib, Trampning Eron va Ummon o‘rtasida erishilgan kelishuvni qabul qilishi noaniq.