Bitiruvchilar uchun 3 yil ishlab berish talabi bekor qilinishi mumkin

Oliy taʼlim muassasalarida davlat grantlari asosida taʼlim olgan bitiruvchilarni ishga taqsimlash tizimini takomillashtirish maqsadida amaldagi tartibga muhim oʻzgartirishlar kiritish rejalashtirilmoqda.

Tegishli qaror loyihasiga koʻra, kadrlarni davlat grantlari asosida maqsadli tayyorlash va ularni ishga taqsimlash tartibi zamonaviy talablar asosida qayta koʻrib chiqilmoqda.

Jumladan, amalda amaldagi “kamida uch yil” ishlab berish majburiyatini bekor qilish taklif etilmoqda. Yangi tartibga muvofiq, bitiruvchilarning ishlab berish muddati har bir taʼlim yoʻnalishining oʻziga xos xususiyatlaridan kelib chiqqan holda vakolatli organ tomonidan alohida belgilanadi.

Shuningdek, hujjatda bitiruvchilarni ishga taqsimlash bilan bogʻliq ayrim tushunchalarga aniqlik kiritish nazarda tutilgan. Xususan, “doimiy yashash joyi” atamasini “yashash joyi” deb almashtirish taklif etilmoqda.

Qaror loyihasida yagona yondashuvdan voz kechib, sohalar kesimida differensial tartibni joriy etish orqali kadrlar tayyorlash samaradorligini oshirish maqsad qilingan.

Mazkur oʻzgartishlar bitiruvchilarni ish bilan taʼminlash jarayonini yanada shaffof va samarali tashkil etishga, shuningdek, mehnat bozori ehtiyojlariga mos kadrlar tayyorlash tizimini rivojlantirishga xizmat qilishi kutilmoqda.