Битирувчилар учун 3 йил ишлаб бериш талаби бекор қилиниши мумкин

Олий таълим муассасаларида давлат грантлари асосида таълим олган битирувчиларни ишга тақсимлаш тизимини такомиллаштириш мақсадида амалдаги тартибга муҳим ўзгартиришлар киритиш режалаштирилмоқда.

Тегишли қарор лойиҳасига кўра, кадрларни давлат грантлари асосида мақсадли тайёрлаш ва уларни ишга тақсимлаш тартиби замонавий талаблар асосида қайта кўриб чиқилмоқда.

Жумладан, амалда амалдаги “камида уч йил” ишлаб бериш мажбуриятини бекор қилиш таклиф этилмоқда. Янги тартибга мувофиқ, битирувчиларнинг ишлаб бериш муддати ҳар бир таълим йўналишининг ўзига хос хусусиятларидан келиб чиққан ҳолда ваколатли орган томонидан алоҳида белгиланади.

Шунингдек, ҳужжатда битирувчиларни ишга тақсимлаш билан боғлиқ айрим тушунчаларга аниқлик киритиш назарда тутилган. Хусусан, “доимий яшаш жойи” атамасини “яшаш жойи” деб алмаштириш таклиф этилмоқда.

Қарор лойиҳасида ягона ёндашувдан воз кечиб, соҳалар кесимида дифференциал тартибни жорий этиш орқали кадрлар тайёрлаш самарадорлигини ошириш мақсад қилинган.

Мазкур ўзгартишлар битирувчиларни иш билан таъминлаш жараёнини янада шаффоф ва самарали ташкил этишга, шунингдек, меҳнат бозори эҳтиёжларига мос кадрлар тайёрлаш тизимини ривожлантиришга хизмат қилиши кутилмоқда.