"Толибон" аёлларга янги тақиқни ўрнатди. Нималар маълум?

Қайд этилишича, "Толибон" ҳукумати "Фазилатни тарқатиш ва гуноҳларни олдини олиш" номли қонун лойиҳасини ишлаб чиққан. Ушбу қонун кириш, 4 та боб ва 35 та моддадан иборат бўлиб, ҳукумат етакчиси Хайбатулла Охундзода томонидан тасдиқланган. Қонунга барча жамоат жойларида амал қилиш ҳамда бутун Афғонистонда яшовчи фуқаролар бўйсуниши талаб қилинган. 

Ҳукуматга кўра, бозорга чиқиб дўкондан нарса харид қилувчи аёл эркакларни овози билан ўзига жалб қилиб, савдолашаётган пайтида уларнинг ҳирсини уйғотади. Шу сабабли "Толибон" ҳукумати аёллар бозорда гаплашмаслиги ёки нархни музокара қилмаслиги кераклигини билдирган. 

Айрим манбаларга кўра, юқорида келтирилган қонунга бўйсунмаганлар жазоланилмоқда. Ҳатто савдо расталарида аёлларга куч ишлатилаётгани ҳақида маълумотлар тарқалган. Бундан ташқари, ҳукумат вакиллари Ғазна вилоятига сафари вақтида журналистларнинг воқеани суратга олишларига рухсат бермаган. 

Афғонистон фуқаролари "Фазилатни тарқатиш ва гуноҳларни олдини олиш" қонунининг жорий этилиши бўйича жиддий ташвишда эканлигини билдирмоқда. Уларга кўра, бу қонун репрессия, қасос олиш, зулм ва кенг кўламдаги суиистеъмол муҳитини яратади. Бундан ташқари, ҳукумат ушбу қонунни ишлаб чиқиб, танқидчиларини камситиш, ҳақорат қилиш ва ҳибсга олиш учун баҳона сифатида ишлатмоқда, дея фикр билдирган фуқаролар. 

Бағлан вилоятидан олинган маълумотларга кўра, вилоят марказидаги масжидда ҳукумат полицияси аёллар ва қизларнинг бозорда бўлишини тақиқлаб, уйдан чиқмасликка чақирган. 

"Аёллар эркак қариндошлари билан бозорда бўлишларига рухсат берилган, аммо улар нархни музокара қила олмайди. Аёллар бутун таналарини, юзларини ёпиб, дўкондор билан гаплашмасдан пулни бериб, маҳсулотни олишлари керак", дейилади хабарда.

Бундан ташқари, "Фазилатни тарқатиш ва гуноҳларни олдини олиш" қонунининг эълон қилиниши билан "Толибон" фуқароларга, айниқса, аёлларга қарши янада қатъий чекловлар қўймоқда. Қонунга қарши бўлган кўплаб эркаклар ҳамда аёллар шанба намозлари ва масжид ваъзларида имомлар томонидан ҳақорат қилаётгани, уларнинг ижтимоий ҳолатини камситаётганини билдирган. 

Ҳукумат эса ушбу қонуни ишлаб чиқишидан мақсад аёлларнинг жамиятда ижтимоий коррупцияни шакллантиришига йўл қўймаслик учун деб изоҳламоқда.