Mubashshir Ahmad 2 yil 6 oyga qamaldi

Toshkent shahar jinoyat ishlari boʻyicha Uchtepa tumani sudida jamoatchilik orasida Mubashshir Ahmad nomi bilan tanilgan diniy ulamo Alisher Tursunovga oid sud majlisi boʻlib oʻtdi. Ushbu sud majlisida Alisher Tursunovga sud tomonidan 2 yil 6 oy muddatga qamoq jazosi tayinlandi. Bu haqda PARADIGMA.UZ jurnalisti xabar qildi.

Ish – sudya Bobur Rahimov raisligida, qoralovchi – Uchtepa tumani prokurori oʻrinbosari Erkin Narzullayev, shuningdek, Abdulloh Sodiq boshchiligidagi advokatlar ishtirokida koʻrib chiqildi.

Sudya Bobur Rahimov raisligida oʻtgan sud majlisining muzokara bosqichida davlat ayblovchisi Mubashshir Ahmadga 7 yil ozodlikdan mahrum qilish jazosi berilishini soʻragan edi.

Alisher Tursunovga nisbatan Jinoyat kodeksining uchta moddasi boʻyicha ayblov qoʻyilgan:

●     244-3-modda: Diniy mazmundagi materiallarni qonunga xilof ravishda tayyorlash, saqlash, olib kirish yoki tarqatish;

●     244-1-modda: Jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish;

●     156-modda: Milliy, irqiy, etnik yoki diniy adovat qoʻzgʻatish.

Ish yuzasidan birinchi sud majlisi joriy yilning 19 avgust kuni boʻlib oʻtdi. Unda prokuror ish yuzasidan ayblov xulosasini oʻqib eshittirdi. Mubashshir Ahmad oʻziga qoʻyilgan ayblovlarning qariyb barchasini rad etdi. Faqatgina ijtimoiy tarmoqlarda eʼlon qilingan materiallarni Diniy qoʻmita ruxsati bilan chop etmaganini tan olib, bungan bu davrda Turkiya davlati hududida yashagani, shuning uchun xulosa olishga zarurat yoʻq deb hisoblagani sabab boʻlganini taʼkidladi.

Majlis Mubashshir Ahmad tomonidan ijtimoiy tarmoqlarida eʼlon qilingan materiallarga tergov organining soʻroviga koʻra xulosa bergan ekspertlar yoʻqligi sababli qoldirildi. Ikkinchi sud majlisida "Renessans" universitetining siyosatshunoslik fanlari boʻyicha professori Odil Musayev materiallar boʻyicha siyosiy xulosalar bergan. Din ishlari boʻyicha qoʻmita Dinshunoslik ekspertizasi boʻlimi mutaxassisi Shahboz Nizomov esa materiallarni diniy nuqtayi nazardan baholagan.

Sud jarayoni shu vaqtga qadar turli sabablarga koʻra uch marta qoldirildi. Oxirgi marta bunga sudyaning salomatligi yomonlashgani va taʼtilda ekani sabab boʻlgani xabar qilindi.