Eko-stikerlar uchun qancha miqdorda toʻlov qilinadi?

Atmosfera havosini muhofaza qilish, ekologik barqarorlikni taʼminlash hamda fuqarolar salomatligini asrash maqsadida Oʻzbekistonda avtotransport vositalaridan chiqadigan zararli moddalarni nazorat qilishga qaratilgan «Ekologik transport» tizimi joriy etilmoqda.

Ushbu tizim doirasida transport vositalarini ekologik toifa va sinflarga ajratish hamda shu asosda eko-stikerlar berish tartibi belgilandi. Eko-stiker mutlaqo bepul hisoblanadi.

Eko-stiker nima?

Eko-stiker — transport vositasining ekologik toifasini tasdiqlovchi elektron maʼlumotlarni oʻz ichiga olgan maxsus yorliqdir.

Eko-stikerlar uch xil rangda boʻladi:

• 🟢 Yashil — «toza» ekologik daraja
• 🟡 Sariq — «oʻrtacha» ekologik daraja

• 🔴 Qizil — «zararli» ekologik daraja

  Qaysi transport vositalariga tatbiq etilmaydi?

Mazkur tartib quyidagi transport vositalariga nisbatan qoʻllanilmaydi:

• tranzit orqali harakatlanayotgan transportlar;
• Oʻzbekistonda 90 kungacha vaqtincha boʻlib turgan transport vositalari;
• elektromobillar va elektromototransport;
• mototransport, skuter, moped va uch gʻildirakli transportlar;
• tezkor va maxsus xizmat transportlari;
• jamoat transporti (taksi va yoʻnalishli taksidan tashqari);
• qishloq xoʻjaligi texnikalari;

• «nogironligi boʻlgan shaxs» belgisi oʻrnatilgan transport vositalari.

   

Ekologik toifa qanday aniqlanadi?

Transport vositasining ekologik toifasi:

• ishlab chiqaruvchi tomonidan belgilangan ekologik sinf («Yevro» standartlari) asosida;
• ekologik sinfi aniqlanmagan hollarda esa diagnostika tekshiruvlari natijasiga koʻra belgilanadi.

Diagnostika tekshiruvlari Ichki ishlar vazirligi huzuridagi maxsus ekologik operatorlar tomonidan oʻtkaziladi va barcha maʼlumotlar «Avtomototransport hisobi» yagona elektron tizimiga kiritiladi.

«Yevro» standartlari boʻyicha taqsimot

Benzin va gazda ishlovchi transportlar:

• 🟢 «Yevro-2» va undan yuqori — toza;
• 🟡 «Yevro-0» va «Yevro-1» — oʻrtacha.

Dizel yoqilgʻisida ishlovchi transportlar:

• 🟢 «Yevro-4» va undan yuqori — toza;
• 🟡 «Yevro-3» — oʻrtacha;
• 🔴 «Yevro-0», «Yevro-1», «Yevro-2» — zararli.

🟢 Gibrid hamda 3 yildan oshmagan transport vositalari avtomatik ravishda toza toifaga kiritiladi.

Eko-stiker qanday va qayerda beriladi?

• Foydalanilayotgan transport vositalari uchun eko-stiker egasining ixtiyoriy murojaati asosida rasmiylashtiriladi.
• Transportni roʻyxatga olish yoki qayta roʻyxatdan oʻtkazish jarayonida eko-stiker bepul beriladi.
• Stiker old oyna pastki oʻng burchagiga, ichki tomondan yopishtiriladi.

Eko-stikerlar muddatsiz amal qiladi. Quyidagi holatlarda u qayta rasmiylashtiriladi:

• transport egasi yoki davlat raqami oʻzgarganda;
• old oyna almashtirilganda;

• stiker shikastlanganda yoki oʻchib ketganda.

   

Qayta diagnostika va toʻlov

Transport vositasi egasi:

• yilda bir marta bepul qayta diagnostikadan oʻtib, ekologik toifani yaxshilash huquqiga ega;
• takroriy tekshiruvlar bazaviy hisoblash miqdorining 1 barobari miqdorida toʻlov evaziga amalga oshiriladi.

Ushbu tartib aholi punktlarida ekologik xavfsizlikni taʼminlash, transport vositalaridan chiqadigan zararli moddalarni kamaytirish va shaharlar havosini tozalashga qaratilgan muhim qadam hisoblanadi. Eko-stiker tizimi orqali har bir fuqaro oʻz transportining atrof-muhitga taʼsiri haqida aniq maʼlumotga ega boʻladi.