Эко-стикерлар учун қанча миқдорда тўлов қилинади?

Атмосфера ҳавосини муҳофаза қилиш, экологик барқарорликни таъминлаш ҳамда фуқаролар саломатлигини асраш мақсадида Ўзбекистонда автотранспорт воситаларидан чиқадиган зарарли моддаларни назорат қилишга қаратилган «Экологик транспорт» тизими жорий этилмоқда.

Ушбу тизим доирасида транспорт воситаларини экологик тоифа ва синфларга ажратиш ҳамда шу асосда эко-стикерлар бериш тартиби белгиланди. Эко-стикер мутлақо бепул ҳисобланади.

Эко-стикер нима?

Эко-стикер — транспорт воситасининг экологик тоифасини тасдиқловчи электрон маълумотларни ўз ичига олган махсус ёрлиқдир.

Эко-стикерлар уч хил рангда бўлади:

• 🟢 Яшил — «тоза» экологик даража
• 🟡 Сариқ — «ўртача» экологик даража

• 🔴 Қизил — «зарарли» экологик даража

  Қайси транспорт воситаларига татбиқ этилмайди?

Мазкур тартиб қуйидаги транспорт воситаларига нисбатан қўлланилмайди:

• транзит орқали ҳаракатланаётган транспортлар;
• Ўзбекистонда 90 кунгача вақтинча бўлиб турган транспорт воситалари;
• электромобиллар ва электромототранспорт;
• мототранспорт, скутер, мопед ва уч ғилдиракли транспортлар;
• тезкор ва махсус хизмат транспортлари;
• жамоат транспорти (такси ва йўналишли таксидан ташқари);
• қишлоқ хўжалиги техникалари;

• «ногиронлиги бўлган шахс» белгиси ўрнатилган транспорт воситалари.

   

Экологик тоифа қандай аниқланади?

Транспорт воситасининг экологик тоифаси:

• ишлаб чиқарувчи томонидан белгиланган экологик синф («Евро» стандартлари) асосида;
• экологик синфи аниқланмаган ҳолларда эса диагностика текширувлари натижасига кўра белгиланади.

Диагностика текширувлари Ички ишлар вазирлиги ҳузуридаги махсус экологик операторлар томонидан ўтказилади ва барча маълумотлар «Автомототранспорт ҳисоби» ягона электрон тизимига киритилади.

«Евро» стандартлари бўйича тақсимот

Бензин ва газда ишловчи транспортлар:

• 🟢 «Евро-2» ва ундан юқори — тоза;
• 🟡 «Евро-0» ва «Евро-1» — ўртача.

Дизел ёқилғисида ишловчи транспортлар:

• 🟢 «Евро-4» ва ундан юқори — тоза;
• 🟡 «Евро-3» — ўртача;
• 🔴 «Евро-0», «Евро-1», «Евро-2» — зарарли.

🟢 Гибрид ҳамда 3 йилдан ошмаган транспорт воситалари автоматик равишда тоза тоифага киритилади.

Эко-стикер қандай ва қаерда берилади?

• Фойдаланилаётган транспорт воситалари учун эко-стикер эгасининг ихтиёрий мурожаати асосида расмийлаштирилади.
• Транспортни рўйхатга олиш ёки қайта рўйхатдан ўтказиш жараёнида эко-стикер бепул берилади.
• Стикер олд ойна пастки ўнг бурчагига, ички томондан ёпиштирилади.

Эко-стикерлар муддатсиз амал қилади. Қуйидаги ҳолатларда у қайта расмийлаштирилади:

• транспорт эгаси ёки давлат рақами ўзгарганда;
• олд ойна алмаштирилганда;

• стикер шикастланганда ёки ўчиб кетганда.

   

Қайта диагностика ва тўлов

Транспорт воситаси эгаси:

• йилда бир марта бепул қайта диагностикадан ўтиб, экологик тоифани яхшилаш ҳуқуқига эга;
• такрорий текширувлар базавий ҳисоблаш миқдорининг 1 баробари миқдорида тўлов эвазига амалга оширилади.

Ушбу тартиб аҳоли пунктларида экологик хавфсизликни таъминлаш, транспорт воситаларидан чиқадиган зарарли моддаларни камайтириш ва шаҳарлар ҳавосини тозалашга қаратилган муҳим қадам ҳисобланади. Эко-стикер тизими орқали ҳар бир фуқаро ўз транспортининг атроф-муҳитга таъсири ҳақида аниқ маълумотга эга бўлади.