Oʻzbekistonga sovuq antitsiklon kirib kelmoqda

Oʻzgidromet maʼlum qilishicha, havo aylanishining sustligi va harorat inversiyasi shakllanishi ehtimoli tufayli ifloslantiruvchi moddalar atmosferaning yerga yaqin qatlamida toʻplanib qoladi. 

Ayni paytda kechasi 5–7 daraja, kunduzi esa 16–18 daraja iliq boʻlishi haroratlar orasida keskin farqni yuzaga keltirmoqda.

Xususan, Toshkent shahri nam va nisbatan salqin havo massasi taʼsirida qolmoqda. Ertalabki soatlarda tuman, yuqori namlik va deyarli shamolsiz ob-havo kuzatilib, havo almashinuvi juda sekin kechishi mumkin. Bu esa chiqindilarning shahar hududida saqlanib qolishiga olib keladi.

Maʼlum qilinishicha, atmosferada asosan shaharlarga xos boʻlgan ifloslantiruvchi moddalar toʻplanadi. Ular asosan avtotransport, isitish tizimlari, yoqilgʻini yoqish va sanoat chiqindilaridan hosil boʻladi. Bunday sharoitda havoda chang va mayda zarrachalar konsentratsiyasi ortishi mumkin.

Mutaxassislar bu holat yaqin uch kun davom etishini bildirmoqda. 10 martga kelib sovuq antitsiklon mamlakat hududini toʻliq qamrab oladi. Havo harorati barqarorlashishi, shamol tezligi oshishi va yogʻingarchilik kuzatilishi natijasida atmosferadagi ifloslantiruvchi moddalar tarqalishi kutilmoqda.