BBC 2000 тагача иш ўрнини қисқартиради

Чоршанба куни BBC яқин икки йил ичида 2000 тагача иш ўрнини қисқартиришни режалаштираётганини маълум қилди.

Вақтинчалик бош директор Родри Талфан Девиснинг AFP ахборот агентлигига берган баёнотида қисқартиришлар BBCнинг “жиддий молиявий босимларга дуч келаётгани ва уларга зудлик билан чора кўриш зарурати” туфайли юзага келганини таъкидлади.

Унинг сўзларига кўра, ташкилот ўзининг 5,7 миллиард евро миқдоридаги операцион харажатларидан 575 миллион евро қисқартириши керак. Тежамкорлик чораларининг асосий қисми 2027 ва 2028 йилларга тўғри келади.

Бу телерадиокомпаниядаги сўнгги 15 йилдаги энг йирик иш ўринлари қисқариши бўлади.

BBC сунъий интеллект ва фойдаланувчилар одатларининг ўзгариши туфайли беқарорлашиб бораётган медиа муҳитида  иш ўринларини қисқартирмоқда.

АҚШ президенти Доналд Трамп телеканални 10 миллиард доллар (8,4 миллиард евро) миқдорида туҳматда айблаб, судга берди. Бунга телеканал эфирга узатган ҳужжатли фильмда унинг 2021 йил АҚШ Капитолийсидаги ғалаёнлар олдидан сўзлаган нутқи ўзгартирилгани, гўёки у ўз тарафдорларини Конгресс биносига ҳужум қилишга очиқдан-очиқ даъват этгандек кўрсатилгани сабаб бўлган.

Келаси ойдан бошлаб BBCда Google'нинг собиқ раҳбари Метт Бриттин янги бош директор бўлиб иш бошлайди. Унинг тайинланиши корпорацияни трансформация давридан олиб ўтиш вазифаси билан боғлиқ.

BBC контентни кўриш ёки тинглаш учун лицензия сотиб оладиган аҳоли маблағлари ҳисобидан молиялаштирилади. 

Ташкилот маълумотларига кўра, Буюк Британиядаги вояга етган аҳолининг 94 фоизи ҳар ой унинг хизматларидан фойдаланади.

Март ойидаги ҳисоботида BBC лицензия тўловларидан тушган даромади 2017 йилдан буён 24 фоизга камайганини маълум қилган.

“Лицензия тўловлари билан боғлиқ қийинчиликлар ва бошқа босимлар туфайли 2029 йил март ойига қадар умумий харажатларимизни 10 фоизга камайтиришимиз зарур”, — дейилади ҳисоботда ва бу мураккаб танлов натижасида контент ва хизматлар ҳам қисқариш эҳтимоли айтиб ўтилган.