Бухорода вояга етмаган бола отасини 15 суткага қаматди

Омбудсман хабарига кўра, мурожаат йўллаган вояга етмаган бола Бухоро вилояти Ғиждувон туманида яшовчи, 2008 йилда туғилган А.Ў. (ўғил) бўлиб, у оиласида фақат онаси доимий ишда ишлаши, отаси расмий иш билан банд эмаслиги, вақти-вақти билан мавсумий ишлаб, топган пулига ҳар куни спиртли ичимлик ичишини айтган. 

Шунингдек, у мурожаатда отаси ярим кечаси уйга келиб жанжал қилишини, оила аъзоларини ҳақоратли сўзлар билан сўкиши ва уришини билдирган. 

Болага кўра, отаси онасини ўлдириш билан қўрқитиб, акасини эса уйдан ҳайдаб юборган. А.Ў. онаси маиший зўравонлик туфайли ҳимоя ордери олганлигини, лекин отаси ҳимоя ордери талабларига риоя қилмаётганлигини билдириб, ўзини, онаси ва акасини отасининг руҳий ва жисмоний зўравонлигидан ҳимоя қилишни сўраган. 

"Болалар омбудсманининг Бухоро вилояти ички ишлар бошқармасига юборган сўрови асосида вояга етмаган А.Ў.нинг оиласи, яшаш шароити ва бугунги кундаги аҳволи ўрганилди. Текширув давомида мурожаатдаги важлар ўз тасдиғини топиб, жорий йилнинг 14 август куни А.Ў. нинг онаси Ғ.Д. га отаси Ғ.Н. томонидан зўравонлик ва тазйиқ ўтказилишини олдини олиш мақсадида берилган ҳимоя ордерининг талабларига риоя этиш назоратга олинди", дейилади хабарда. 

Маълум бўлишича, Ғ.Н. туман суди томонидан Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси 1-қисми бўйича айбдор деб топилиб, унга 15 сутка маъмурий қамоқ жазоси тайинланган. 

Шу билан бирга, А.Ў.нинг отаси спиртли ичимликка ружу қўйганлиги юзасидан суд қарорига асосан мажбурий даволанишга жойлаштириш бўйича ҳужжатлар расмийлаштирилган.