Ўзбекистон ва АҚШ ўртасида қанча миқдордаги келишув имзоланди?

Ҳужжатлар саноат, транспорт, энергетика, муҳим минераллар, молия, рақамли технологиялар, қишлоқ хўжалиги, соғлиқни сақлаш ва таълим соҳаларини қамраб олади.

Бу ҳақда Ўзбекистон Инвестициялар, саноат ва савдо вазирлиги маълумот берди.

Келишувлар инвестиция киритиш, технологиялар алмашинуви ва савдо ҳамкорлигини ривожлантиришни назарда тутади.

Молиявий ҳамкорлик доирасида Franklin Templeton, Oppenheimer & Co., Citigroup ва BlackRock билан тузилган келишувлар Ўзбекистон компанияларининг халқаро капитал бозорларига чиқиши, институционал инвесторларни жалб қилиш ва инфратузилма лойиҳаларини молиялаштиришга қаратилган.

Wabtec билан ҳамкорлик темирйўл техникаси ва эҳтиёт қисмлари ишлаб чиқаришни маҳаллийлаштиришни кўзда тутади. GE Aerospace эса Uzbekistan Airways авиакомпаниясининг янги самолётлари учун двигателлар етказиб беради.

Кончилик соҳасида ReElement Technologies, Traxys ва Trafigura билан келишувлар тузилган. Улар конларни ўрганиш ва ўзлаштириш, технологиялар алмашинуви ҳамда муҳим минераллар тоифасига кирувчи табиий ресурсларни етказиб бериш масалаларини қамраб олади.

Бундан ташқари, Amazon Leo билан сунъий йўлдош алоқасини ривожлантириш, GE HealthCare билан замонавий тиббий технологияларни жорий этиш, Valmont Industries билан эса қишлоқ хўжалиги самарадорлигини ошириш бўйича ҳамкорлик режалаштирилган.

19 октябрь куни Самарқандда Марказий Осиё давлатлари ва АҚШ ўртасидаги C5+1 форматидаги музокараларнинг бизнес дастури бошланди.

Вазирлик маълумотларига кўра, унда 400 дан ортиқ компания вакиллари қатнашмоқда. Уларнинг 100 дан ортиғи АҚШ, 100 таси Марказий Осиёнинг бошқа давлатлари ва 200 таси Ўзбекистон компанияларидир.