Лотин Америкасига йўл: Рио-де-Жанейрода Ўзбекистон–Бразилия савдо уйи иш бошлади

Ўзбекистоннинг АҚШдаги элчихонаси ташаббуси билан Бразилиянинг Рио-де-Жанейро шаҳрида илк Ўзбекистон–Бразилия савдо уйи ташкил этилиб, тўлиқ ишга туширилди.

Мазкур тузилма маҳаллий қонунчилик асосида тўлиқ юридик рўйхатдан ўтказилиб, “Brazilian–Uzbekistan Trade House Ltd.” номи билан хўжалик юритувчи субъект мақомидаги савдо компанияси сифатида ўз фаолиятини бошлади.

Янги компания учун шартномавий муносабатларга киришиш, экспорт-импорт амалиётларини йўлга қўйиш ҳамда Бразилия бозорида ўзбек маҳсулотларини сотиш имконини берувчи зарур ҳуқуқий ва тизимли асослар яратилди.

Рио-де-Жанейро шаҳри Бразилиянинг муҳим молиявий, туристик, транспорт ва йирик логистика маркази ҳисобланади.

Бу эса ўзбек экспортчилари учун нафақат Бразилия, балки Меркосур (MERCOSUR) блокига аъзо Аргентина, Чили, Парагвай, Уругвай, Перу, Колумбия каби Лотин Америкасининг бошқа етакчи давлатлари бозорларига чиқишда стратегик дарвоза вазифасини ўтайди.

Савдо уйи тижорий операциялар жараёнида логистика, мултимодал ташувлар, омборхона ва порт инфратузилмасидан самарали фойдаланиш билан боғлиқ ташкилий масалаларни ҳал этишда тадбиркорларга яқиндан кўмак беради.

Яқин кунларда савдо уйи таъсисчиларининг Ўзбекистон Инвестициялар, саноат ва ташқи савдо вазирлиги, Савдо-саноат палатаси, экспортчилар уюшмалари ва тармоқ ташкилотлари билан амалий савдо операцияларини бошлаш бўйича онлайн музокаралари ташкил этилиши режалаштирилган.