АҚШ БМТ харажатлар тизимини тубдан ислоҳ қилишни талаб қилди

Бу ҳафта Devex янгиликлар агентлиги АҚШ томонидан тарқатилган икки дипломатик нотада кўпроқ маблағ ажратиш шарти сифатида тўққизта тезкор ислоҳот, жумладан, харажатларни янада қисқартириш ва Хитойнинг БМТдаги таъсирига қарши ҳаракат қилишга чақирилганини хабар қилди.

“Биз гаплашаётган пуллар мажбурий бадаллар деб аталади”, – деди Гутерриш ҳисоботлар ҳақидаги саволга жавобан журналистларга. – “Мажбурий бадаллар аъзо давлатларнинг бурчидир. Улар муҳокама қилинмайди”.

Аъзо давлатлар, айниқса, Қўшма Штатларнинг босими остида ислоҳотларни амалга ошираётган Гутерриш “ушбу ташкилотни БМТ ғамхўрлик қиладиган инсонларга имкон қадар самарали, тежамкор ва хизмат кўрсата оладиган ҳолга келтириш учун қўлдан келган барча ишни қилишини” таъкидлади.

“Аммо бу иккаласи икки хил нарса”, – дея қўшимча қилди у.

Нашрга кўра, АҚШ талаб қилган харажатларни қисқартириш чора-тадбирлари қуйидагиларни ўз ичига олган:

-      БМТ нафақа тизимини тубдан ислоҳ қилиш;

-      айрим юқори ва барча ўрта бўғин мутахассисларининг узоқ масофаларга бизнес-классда парвоз қилишини бекор қилиш;

-      БМТнинг юқори лавозимли ходимлари сонини яна қисқартириш;

-      узоқ муддатли ва самарасиз тинчликпарварлик миссияларини 10 фоизга камайтириш.