Пентагон Google сунъий интеллектидан фойдаланишни кенгайтириш бўйича келишув тузди

Ушбу хабар АҚШ ҳарбийлари Anthropic компаниясининг сунъий интеллектидан воз кечишга ҳаракат қилаётган бир пайтда янграмоқда. Бунга компаниянинг ўз технологиясидан оммавий ички кузатув ёки номустақил қотил машиналар учун фойдаланишга қарши экани сабаб бўлган.

АҚШ ҳарбийлари доирасидаги махфий операцияларда фойдаланиш учун фақат Anthropic компаниясининг Claude сунъий интеллект моделига рухсат берилган эди.

Февраль ойида Пентагон раҳбари Пит Hegset Anthropic'ни миллий хавфсизлик таъминот занжири учун хавф деб топгач, Трамп АҚШ ҳукуматига Anthropic технологиясидан фойдаланишни “зудлик билан тўхтатиш”ни буюрган эди. Бу ёрлиқ одатда душман мамлакат ташкилотлари учун қўлланади.

Ҳозирда компания ушбу чораларга қарши судда курашмоқда.

Anthropic'нинг Claude номли сунъий интеллект модели АҚШ ҳарбийлари доирасидаги махфий операцияларда фойдаланиш учун рухсат берилган ягона модель эди.

Anthropic билан юзага келган можародан сўнг, рақобатчи OpenAI ўзининг сунъий интеллект интерфейсларини ушбу тизимга интеграция қилиш юзасидан ҳукумат билан келишувга эришди.

Технология янгиликлари сайти The Information'га кўра, Илон Маскнинг xAI компанияси ҳам Anthropic билан келишмовчиликдан сўнг Пентагон билан шартнома тузган.

"Ягона бир таъминотчига ортиқча таяниб қолиш ҳеч қачон яхшиликка олиб келмайди," – деди Пентагоннинг рақамли технологиялар бўйича бош директори Камерон Стенли.

Хабарларга кўра, Пентагоннинг технология провайдерлари билан тузган келишувлари сунъий интеллект воситаларидан фақат қонун доирасида фойдаланишни кўзда тутади.

Душанба куни 600 дан ортиқ Google ходими ўз сунъий интеллект технологиясини ҳарбий амалиётларда қўллашга имкон берадиган Пентагон таклифини рад этишни компаниядан талаб қилган.

Google бош директори Сундар Пичаи номига йўлланган мактубни компаниянинг бир неча бўлинмалари ходимлари имзолаган.

Пентагон тезкор ҳаракатланиш мослашувчанлигини сақлаб қолиш зарурлигини даъво қилиб, сунъий интеллектга оид келишувларда умумий мазмундаги бандлар бўлишини талаб қилмоқда.

2018 йилда ходимлар ҳаракати Google'ни дрон операцияларига сунъий интеллектни жорий этишга қаратилган Пентагоннинг Project Maven дастуридан воз кечишга мажбур қилган эди.

Бироқ, сўнгги йилларда Google ўз стратегиясини ўзгартирди — компания ўзининг ҳарбий бизнесини изчил равишда қайта тикламоқда ва мудофаа соҳасидаги шартномалар учун рақобатчилари билан курашмоқда.